Rıgada kólik ıelerine avtobýsta tegin júrýge ruqsat etildi
ASTANA. 13 jeltoqsan. QazAqparat - Qar jaýyp turǵan kezde Rıgalyq kólik ıelerine qoǵamdyq kólikterde tegin júrýge ruqsat etildi.
Bul týraly Facebook -ta qala meri Nıl Ýshakov jazdy dep habarlaıdy Lenta.rý.
«Biz tájirıbe júrgizemiz. Qar jaýyp turǵan kúnderi kóliktiń tehnıkalyq tólqujatyn kórsetken jaǵdaıda kúni boıy avtobýstarda tegin júrýge bolady», - dedi ol.
Onyń aıtýynsha, kóliktiń ózińdiki nemese týysqanyńdiki, ıa bolmasa lızıngke alynǵandyǵy mańyzdy emes. «Qala úshin mańyzdysy - kóliktiń aýlada nemese garajda turǵany», - deıdi mer.
Qalalyq bılik joba barysynda mundaı kúnderdi aýa raıynyń boljamyna qarap, aldyn ala habarlap otyrady.
Máselen, búgin Rıgada qar jaýyp tur. Sondyqtan mer kóligi barlarǵa qarata, kóligin úıinde qaldyryp, tehqujatyn qaltasyna salyp, qoǵamdyq kóliktermen júrýge shaqyrdy.
Budan buryn Estonııanyń astanasy Tallınde barlyq turǵyndar men syrttan kelgen zeınetkerler jáne stýdentter úshin qoǵamdyq kólikte tegin júrý múmkindigi qarastyrylǵan bolatyn. Eger qalalyq keńes qala meri Edgar Savısaardyń bul usynysyn qoldasa, 2013 jyldan bastap tallındikter qoǵamdyq kólikte tegin júretin bolady. Endi Rıga men Vılnıýs basshylyǵy da bul bastamany birtindep qolǵa alýǵa qulshynys bildirip otyrǵan kórinedi.
