Rıgada Qazaqstan-Latvııa úkimetaralyq komıssııasynyń úshinshi otyrysy ótti
ASTANA. Sáýirdiń 23-i. QazAqparat - Rıgada beısenbi, sáýirdiń 22-sinde Saýda-ekonomıkalyq yntymaqtastyq jónindegi qazaqstan-latvııa úkimetaralyq komıssııasynyń úshinshi májilisi ótti,
dep habarlaıdy syrtqy saıasat vedomstvosynyń baspasóz qyzmetinen.
Komıssııa májilisin teń tóraǵalar, Qazaqstan jaǵynan - Syrtqy ister mınıstrliginiń jaýapty hatshysy Rapıl Joshybaev, Latvııa tarapynan Qatynas mınıstri Kaspars Gerhards ashty.
Delegatsııa jetekshileri qazaqstan-latvııa úkimetaralyq komıssııasynyń 2-shi májilisi kelisimderiniń júzege asyrylý barysyna oń baǵa berip, ekijaqty saýda-ekonomıkalyq jáne ǵylymı-tehnıkalyq yntymaqtastyqtyń birtindep damyp kele jatqanyn atap kórsetti.
Kólik jáne tranzıt, kásipkerlik, standarttaý, bilim jáne ǵylym, densaýlyq saqtaý, halyqty áleýmettik qorǵaý jáne qorshaǵan ortany qorǵaý sııaqty salalardaǵy ózara is-qımyldardyń aýqymdy máseleleri qaraldy.
Komıssııa májilisi barysynda sondaı-aq Oral qalasyndaǵy Azamattyq avıatsııa ýchılışesiniń ushý-tehnıkalyq bazasynda Latvııa Kólik jáne baılanys ınstıtýtynyń fılıalyn ashý máselesine qatysty kelisimge qol jetkizildi. Latvııa tarapy Іskerlik yntymaqtastyq jónindegi Qazaqstan-Latvııa birlesken keńesin qurýǵa múddelilik bildirdi.
Májilis qorytyndysy boıynsha ekijaqty saýda-ekonomıkalyq yntymaqtastyqtyń perspektıvalyq baǵyttary kórsetilgen hattamaǵa qol qoıyldy. Komıssııa jumysynyń aıasynda bıznes-semınar ótti. Qazaqstandyq delegatsııa sonymen birge, Rıga aılaǵynyń, halyqaralyq áýejaıynyń jáne «Air Baltic» kompanııasynyń basshylyǵymen kezdesýler ótkizdi.
