Rıgada Qazaq kınosynyń festıvali ótýde
ASTANA. Naýryzdyń 27-si. QazAqparat - Rıgada tuńǵysh ret Qazaq kınosynyń festıvali ótýde. Bul sharaǵa Qazaqstannyń Baltyq elderindegi jáne Fınlıandııadaǵy Elshiligi, Rıga Dýmasy jáne Latvııanyń «Ave Sol» mádenı qaýymdastyǵy uıytqy bolyp otyr.
Qazaqstan Elshiliginiń baspasóz qyzmetinen habarlaǵandaı, Latvııa elordasynyń turǵyndary men qonaqtaryna sheteldik kınofestıvalderge qatysyp, halyqaralyq qaýymdastyqtyń jaqsy baǵasyn alǵan segiz kórkem fılmmen tanysý múmkindigi usynylyp otyr. Olardyń qatarynda Ardaq Ámirqulovtyń «Qosh bol, Gúlsary», Rústem Ábdirashtyń «Quraq kórpe», «Stalınge syılyq», «Qaladan kelgen qyz» fılmderi, Abaı Qulbaıdyń «Sur qarlyǵash», Jańabek Jetirýovtyń «Jol qaraýshynyń jazbalary», Qanymbek Qasymbekovtyń «Sizge kúshik kerek pe?» jáne Satybaldy Narymbetovtyń «Mustafa Shoqaı» fılmderi bar.
Festıvaldiń saltanatty ashylýynda sóz sóılegen Elshi Ǵalymjan Qoıshybaev, «qazaq kınosynyń festıvali eki eldiń kınotúsýrishýleri arasyndaǵy uzaqmerzimdik baılanystyń bastaýy ǵana bolmaıtynyn, bul sharanyń latvııalyq kórermenderge qazaq halqymen jáne onyń mádenıetimen jaqyn tanysýǵa múmkindik beretinin» atap kórsetti.
