Rıgada aldyńǵy shassısiz ushaq qondy
ASTANA. QazAqparat - Latvııa astanasy Rıga áýejaıynda jolaýshylar ushaǵy shuǵyl túrde qondy. Ushý barysynda shassıdiń aldyńǵy tiregi synǵan. Ushaq sátti qonyp, bortta bolǵan 67 adamnyń bireýi de japa shekpedi, dep habarlady Delfi.
Tótenshe jaǵdaı Air Baltic kompanııasynyń reısinde oryn aldy. Ol Rıgadan Tsıýrıhke baǵyt alǵan. Áýege kóterilgen soń Bombardier Q400 NextGen ushaǵynyń ekıpajy aldyńǵy shassıdegi aqaýlyqty baıqaǵan.
Jolaýshylardyń arasynda Boeing ushqyshy bolǵan. Ol adamdardy qaýipsiz jerge kóshirý kezinde kómektesken. Bortta 4 ekıpaj múshesi men 63 jolaýshy, sonyń ishinde sábı men eki bala bar.
Ushaq qonǵannan keıin áýejaı biraz ýaqytqa jabyldy, sonyń ishinde ushý-qoný jolaǵy tekserildi. Arnaıy qyzmetterdiń aıtýynsha, ushý-qoný jolaǵyna zaqym kelmedi.
Esterińizge sala keteıik, osyndaı oqıǵa elimizde de boldy. 2016 jyly 27 naýryzda Bek Air áýekompanııasyna tıesili «Fokker-100» ushaǵy Astana áýejaıyna aldyńǵy shassıi ashylmaı, apatty jaǵdaıda qonǵan bolatyn. Áýe kemesin komandır Dmıtrıı Rodın qondyrdy. Bortta ekıpaj múshelerin qosqanda barlyǵy 121 adam bolǵan. Zardap shekkender joq.
6 mamyr kúni Aqordada ekıpaj komandıri Dmıtrıı Rodın áskerı jáne qyzmettik mindetin atqarý barysyndaǵy kórsetken batyldyǵy men erligi úshin joǵary dárejeli erekshelik belgisi - «Halyq qaharmany», Altyn juldyz jáne «Otan» ordenimen marapttaldy. Kemeniń ekinshi ushqyshy Vadım Smerechanskıı II dárejeli «Aıbyn» ordenine ıe boldy. Áýe kemesiniń bort serikteri Rýstam Ibragımov, Jadyra Mýdarısova jáne Aleksandr Shestakov «Erligi úshin» medalimen marapattalǵan bolatyn.
