Rıeltorlyq qyzmetti qatań memlekettik retteý qajet – Oljas Quspekov
ASTANA. KAZINFORM - Rıeltorlyq qyzmetti qatań memlekettik retteý qajet. Bul týraly búgin Májilistiń jalpy otyrysynda QR Premer-Mınıstriniń orynbasary – Úkimet Apparatynyń basshysy Ǵalymjan Qoıshybaevqa saýal joldaǵan depýtat Oljas Quspekov aıtty.
«Qazaqstandyqtar «arbıtrajdyq baptan» kóp zardap shegedi. Bul barlyq janjaldar tek arbıtrajda, ıaǵnı jeke sotta sheshiledi degen sóz. Biraq, sýdıalardan aıyrmashylyǵy, arbıtrler eshqandaı jaýapkershilik kótermeıdi jáne olardy sóz baılasýdan, sybaılastyqtan, aldaý men alaıaqtyqtan eshteńe toqtata almaıdy. Arbıtrajda sheshiletin barlyq daýlar rıeltorlyq kompanııalardyń paıdasyna sheshildi. Memlekette rıeltorlardy da, arbıtrajdyq sottardy da baqylaýdyń eshqandaı quraldary joq, bul azamattardyń quqyqtaryn qorǵaýdy tolyq qamtamasyz etýge múmkindik joq degendi bildiredi», - dedi ol.
Onyń dereginshe, Qazaqstanda sońǵy úsh jylda jyljymaıtyn múlikti satyp alý-satý operatsııalarynyń sany shamamen 1,5 mıllıon teńgeni qurady. Krisha.kz saıtyndaǵy jyljymaıtyn múlikti satý týraly habarlandyrýlardyń kem degende jartysyn rıeltorlar jarııalaǵan. ıAǵnı, qazaqstandyqtardyń kóbine amaly qalmaıdy jáne olar rıeltorlarmen jumys isteýge májbúr.
«AQSh, Frantsııa jáne basqa da Eýropa elderiniń tájirıbesi kórsetkendeı, rıeltorlyq qyzmetti qatań memlekettik retteý, lıtsenzııalaýdy engizý, etıkalyq kodeksti qatań saqtaý, bolashaq rıeltorlardyń jeke basyn jáne qylmys jasaǵan-jasamaǵanyn tekserý qajet», - dedi ol.
Osyǵa oraı depýtat mynadaı usynystar jasady:
- rıeltorlyq qyzmetti memlekettik retteýdi belgileý, ony lıtsenzııalaýdy engizý, rıeltorlardy mindetti oqytýdy jáne biliktilik emtıhandaryn tapsyrýdy engizý;
- eldegi barlyq rıeltorlyq kompanııalar úshin «arbıtrajdyq bapty» alyp tastaıtyn bir tıptik kelisimdi ázirleý;
- tájirıbe, bilim, akademııalyq jáne kásibı jetistikteri boıynsha arbıtrlerge qoıylatyn talaptardy arttyrý, sondaı-aq olarǵa júıeli baqylaý ornatý jáne tıisti organdarǵa qyzmeti týraly turaqty esep berýdi talap etý.
