Rıeltorlardyń qyzmeti qanshalyqty zańdy?
ASTANA. QazAqparat - Qazaqstanda rıeltorlyq qyzmetpen aınalysatyn 2 000 kompanııa bolsa, onyń tek 15-inde resmı sertıfıkat bar bolyp shyqty. Al iri kelisimder jasaıtyn mamandardyń júzden biri ǵana arnaıy joǵary bilim alǵan. Bul - Qazaqstan rıeltorlarynyń birikken qaýymdastyǵy bergen málimetter, dep jazady khabar.kz.
Sondyqtan otandastarymyzdyń kóbiniń aldynan kóldeneń shyǵatyn páter tańdaý máselesinde kimge júgingen durys?
Rıeltorlyq qyzmet osydan týra bir ǵasyr buryn AQSh-ta paıda bolǵan. Búginde ekonomıkasy damyǵan elderde ol birshama bedeldi kásip sanalady. Olardyń joǵarǵy bilimi, arnaıy lıtsenzııasy jáne eń bastysy, zańmen bekitilgen quqyqtary bar.
Al bizde qalaı? Bizdiń elde rıeltor - jeke kásipker nemese satý-satyp alý isinde kásibı deldaldyq qyzmet atqaratyn maman. Olarǵa joǵary bilim beretin oqý orny joq, sondyqtan dıplomdy kerek etpeıtin, edáýir tabys tabatyn jumysqa eti tiri, ebi bar kez kelgen jannyń jarmasa ketýi zańdy da.
Al quqyqtaryna kelsek, Qazaqstannyń birde-bir zańynda bul qyzmet túri atalmaǵan.
-Búginde bul suraq QR Azamattyq kodeksiniń 33 bóliminde kórsetilgen. Alaıda rıeltorlyq qyzmettiń suraqtaryn naqty ashpaıdy. Qazaqstanda osy zańnyń qabyldanýy ózekti máseleni sheshýge kómektesetin edi. Jáne josyqsyz, qyzmetterin júzege asyratyndar sanyn azaıtýǵa kómekteser edi, - deıdi zańger Ásem Muratova.
Zań júzinde qyzmet aıasy elep-ekshelip, ara-jigi aıqyndala qoımaǵan soń, osy salanyń saýdasyn sapyryp júrgen sabazdar ózge elderge eliktep, ózinshe ereje túzip alǵan. Ǵalamtordaǵy habarlandyrý arqyly satý ne jalǵa berý úshin qoıylǵan páterdi óz quzyryna alyp, úı izdegen adamǵa usynady. Al tólemdi eki taraptan da talap etedi. Bul - kóbine-kóp rıeltordyń kómegine ıek artatyn astanalyqtarǵa etene tanys.
