Rıeltorlardyń qyzmetine tapsyrys bermegen azamattardan komıssııa alýǵa tyıym salynýy múmkin
ASTANA. KAZINFORM – Qazaqstanda rıeltorlyq qyzmetke biryńǵaı talaptar engizý jáne qyzmetke tapsyrys bermegen azamattardan komıssııa alýǵa jol bermeý usynylyp otyr, dep habarlady Saýda jáne ıntegratsııa mınıstrligi.
Vedomstvo Quryltaı depýtattarymen jáne kásibı qaýymdastyq ókilderimen birlesip, rıeltorlyq qyzmetti retteýge baǵyttalǵan sharalardy ázirlep jatyr.
Bastamanyń negizgi maqsaty – kórsetiletin qyzmetterdiń sapasyn arttyrý, azamattardyń quqyqtaryn qorǵaý jáne rıeltorlar jumysynyń ashyqtyǵyn qamtamasyz etý.
Eń aldymen, rıeltorlyq qyzmet kórsetýdiń biryńǵaı qaǵıdalaryn engizý josparlanyp otyr. Onda mamandardyń jumys tártibi, klıenttermen kelisimshart jasaý jáne qyzmet kórsetý talaptary naqty belgilenbek.
Ásirese kelisimsharttyń mazmunyna basa nazar aýdarylady. Qujatta qyzmet quny, komıssııa mólsheri men ony tóleý tártibi, sondaı-aq eki taraptyń quqyqtary men mindetteri anyq jazylýy tıis.
Taǵy bir mańyzdy usynys – rıeltorlyq qyzmetke tapsyrys bermegen azamattardan komıssııa talap etýge jol bermeý.
– Klıent rıeltor kimniń múddesin qorǵaıtynyn jáne qandaı qyzmet úshin qarajat alatynyn aldyn ala bilýi qajet. Budan bólek, rıeltorlardyń kásibı biliktiligine qoıylatyn talaptardy kúsheıtý josparlanǵan. Mınıstrlik qoldanystaǵy ulttyq standart negizinde qyzmet kórsetý sapasyna, kásibı ádepke, mámilelerdi súıemeldeýge jáne klıenttermen jumys isteýge qatysty mindetti talaptar engizý múmkindigin qarastyrady, – delingen mınıstrlik aqparatynda.
Qazirgi ýaqytta rıeltorlardyń kásibı standarty da ázirlenip jatyr. Bul qujat mamandardyń kásibı qyzmetine qajetti bilimin, daǵdylaryn jáne biliktilik deńgeıin aıqyndaıdy.
Sonymen qatar rıeltorlyq qyzmetti ózin-ózi retteý júıesin damytý usynylǵan.
Bul júıe aıasynda kásibı birlestikter óz múshelerine ortaq talaptar belgilep, olardyń jumysyn baqylaýǵa, azamattardyń shaǵymdaryn qaraýǵa jáne talaptardy buzǵan mamandarǵa qatysty sharalar qabyldaýǵa qatysa alady.
Akkredıttelgen uıymdardyń qatysýymen rıeltorlardyń kásibı biliktiligin rastaý tetigi de pysyqtalyp jatyr.
Eńbek jáne halyqty áleýmettik qorǵaý mınıstrligimen birlesip, rıeltorlardy retteletin kásipter tizimine engizý máselesi qaralady.
Bul rıeltorlardyń kásibı daıarlyǵyna naqty talaptar qoıýǵa jáne olardyń biliktiligin rastaý tártibin belgileýge negiz bolmaq.
Nátıjesinde azamattar qyzmetine júginetin rıeltorlardyń kásibı biliktiligi týraly kóbirek aqparat ala alady.
Tutynýshylardyń quqyqtaryn qorǵaý sharalaryn kúsheıtý de kózdelgen.
Mınıstrlik depýtattarmen birlesip, azamattarǵa qajetsiz qyzmetterdi májbúrli túrde usynýǵa, kelisimshartqa tutynýshy úshin tıimsiz talaptar engizýge jáne negizsiz komıssııa alýǵa jol bermeý úshin qosymsha zańnamalyq sharalardy talqylap jatyr.
Aıta keteıik, buǵan deıin rıeltorlyq qyzmetti retteýge qatysty zań jobasy Quryltaıda qaralyp jatqany habarlanǵan bolatyn. Qujat aıasynda qyzmet kórsetýge ortaq talaptar belgileý, rıeltorlardyń jaýapkershiligin kúsheıtý jáne tutynýshylardyń quqyqtaryn qorǵaý máseleleri talqylanyp jatyr.