«Rıder JEO» AQ-ǵa qarsy 2,7 mlrd teńgege sotqa aryz berildi

ASTANA. QazAqparat – «Rıdder JEO» AQ-nyń tek kredıtorlyq bereshegi 3,3 mlrd teńgeni quraıdy. Bul týraly búgin óńir jýrnalısterine brıfıng bergen Shyǵys Qazaqstan oblysynyń ákimi Danıal Ahmetov aıtty, dep habarlaıdy QazAqparat tilshisi.

«Olar elektr energııasyna da, sýǵa da, mazýtqa da, jumysshylarǵa jalaqy da tólemeıdi. Eshteńemen aınalyspaıdy. Ótken jyldyń 6 qarashasynda ol jerge kóptegen qurylysshylar, mamandar baryp, 600 mln teńgeniń jumysyn atqardy. Oryn alyp otyrǵan jaǵdaıǵa qaramastan joǵary qysymdy tórtinshi jáne besinshi qazandyqty iske qostyq jáne durys jasadyq. Tipti bólshektenip jatqan, bir metr kabel de joq. Jeltoqsanda qazandyqtardy iske qostyq. Solar stansany qutqaryp qaldy. Biraq, kompanııa jumysshylarǵa 1 tıyn da tólemedi», - dedi óńir basshysy.

Onyń atap ótýinshe, búginde kompanııa aqpan aıyndaǵy jalaqy men debıtorlyq bereshegin ótegen.

«Búginde biz 2,7 mlrd teńgege sot aryzyn berdik. Munan ary eger ıesi anabıoz jaǵdaıynan shyǵyp, qarjylandyrýda bastasa, onda is-qımyldyń bir algorıtmi bolady. Eger búgingi jaǵdaı jalǵasa berse, onda zańǵa sáıkes barlyq is-sharany qabyldaımyz», - dedi Danıal Ahmetov.