Rıdderlikterdiń úılerine búgin qaıta ystyq sý berile bastaıdy

Shyǵys Qazaqstan oblysy Rıdder qalasynyń ákimi Dáýlet Batyrbaev óshirilgen qazandyqtyń qashan qaıta iske qosylatyndyǵyn aıtty, dep habarlaıdy QazAqparat tilshisi.

ShQO ákimdiginiń málimetine súıensek, jaz boıy Rıdder JEO-da kúrdeli jóndeý jumystary júrgizilgen. Endi qala qysta jylýsyz qalmaýy tıis.

Osyǵan deıin Rıdder jylý ortalyǵynda qazandyq óship, halyq taǵy ystyq sýsyz qalǵany habarlanǵan.

Qala ákimi Dáýlet Batyrbaev qazandyq ýaqytsha óshirilgenin, bunyń tekserý jumystaryna baılanysty qalypty jaǵdaı ekendigin málim etti.

- Alǵash ret iske qosylǵan jabdyqtar bolǵandyqtan muqııat tekserilip, olqylyqtary bolsa, sýyq túskenge deıin retke keltirilýi qajet. Sondyqtan qazandyqtyń jumysy ýaqytsha toqtatyldy. Ystyq sý úılerge búgin qaıta berile bastaıdy. Energetıkalyq stantsııalar men jelilerdi paıdalanýdyń tehnıkalyq qaǵıda reglamentine sáıkes kúrdeli jóndeý júrgizilgen jabdyq 48 saǵat ishinde júkteme synaǵynan ótkiziledi. Jabdyq 72 saǵat ishinde qalypty júktememen úzdiksiz jumys istegen jaǵdaıda keshendi synaqtan ótti dep esepteledi, – dedi ol.