Rıdderlikter páterleriniń salqyndyǵyna shaǵymdandy

RIDDER. KAZINFORM - Shyǵys Qazaqstan oblysy Rıdder qalasynda qyrkúıek aıynyń sońynda jylytý maýsymy bastalǵanymen, turǵyndar úıleriniń áli jylymaǵanyna narazy.

Halyq áleýmettik jelide alǵashqy qar túskennen keıin, túnde synap baǵanasy nólden tómendep, úıleriniń durys jylymaı turǵanyna shaǵymdandy. Olardyń aıtýynsha, radıatorlar qyzbaı páter ishindegi aýa temperatýrasy +16 gradýstan aspaıdy.

Bul jaǵdaıǵa qatysty ShQO Energetıka jáne turǵyn úı-kommýnaldyq sharýashylyq basqarmasynan jaýap berdi.

— Bul tosyn jaǵdaı emes, qazir abonentterdi kezeń-kezeńimen jylýǵa qosý júrip jatyr. Keshe ǵana jylý «Kaztsınk» zaýytynyń tsehtaryna berildi. Sonyń saldarynan ýaqytsha qysym tómendedi. Búgin qosymsha birinshi qazandyq iske qosyldy. Qazir úsh qazandyq, atap aıtqanda ekinshi, besinshi jáne birinshi qazandyq jumys istep tur. Jylý berý temperatýrasy 70 gradýsqa jetti. Temperatýralyq rejım birtindep turaqtalyp keledi, - dedi basqarma basshysy Nurlan Ramazanov.

Óz sózinde ol qazir Rıdderde júrgenin, jabdyqtardyń iske qosylý barysyn baqylap otyrǵanyn jetkizdi. Qosymsha qýattyń iske qosylýy júıeniń jumysyn aldaǵy táýlik ishinde tolyq turaqtandyrýǵa múmkindik beredi. Mamandar jylý elektr ortalyǵynda jáne jelilerde kórsetkishterdi táýlik boıy baqylaýda ustap, jylýdyń barlyq kóshege birkelki jetýin qamtamasyz etip otyr.

Rıdder qalasynyń ákimi Dýman Rahmetqalıev te jylytý maýsymynyń belgili tártippen iske qosylatynyn túsindirdi.

— Eń aldymen jylýǵa áleýmettik nysandar qosylady. Sodan soń turǵyn úılerge, keıin óndiristik kásiporyndarǵa jylý beriledi. Júıede sý kólemi kóbeıgen sátte temperatýra ýaqytsha tómendeýi múmkin, biraq bir táýlik ishinde qalypqa keledi, - dedi shahar basshysy.

Bıyl jazda Rıdder jylý elektr ortalyǵynda jabdyqtardy kúrdeli jáne aǵymdaǵy jóndeýden ótkizýge 2,7 mlrd teńge, al jylý jelilerin aýystyrýǵa 3,4 mlrd teńge jumsalǵan.

Eske salsaq, osyǵan deıin Petropavlda keı úılerge jylý berý keshiktirilip jatqanyn jazǵan bolatynbyz.