Rıdderlik kásipkerler jylý aqysynyń durys eseptelmegenine narazy

ÓSKEMEN. KAZINFORM – Shyǵys Qazaqstan oblysy Rıdder qalasyndaǵy kásipkerler jylý aqysynyń durys eseptelmegenine narazazylyq bildirdi.

Kásipkerlerge 2022-2023 jyldardaǵy jylý úshin bereshekteri bar ekendigi týraly eskertý kelgen. Dál osy kezeńde Rıdderdegi jylý elektr ortalyǵynda apat shyǵyp, qalada tótenshe jaǵdaı rejımi jarııalanǵan edi. Bıznes ókilderi ózderine qyzmettiń múlde kórsetilmegenin aıtyp, jylý úshin bereshektiń negizsizdigin alǵa tartty.

Bul másele ShQO Kásipkerler palatasy janyndaǵy Kásipkerler quqyqtaryn qorǵaý keńesinde qaraldy. 

– Bereshek retinde kórsetilgen soma bizdiń derekterimen sáıkes kelmeıdi. Al sol kezderdegi kórsetilgen qyzmet aktilerin alý múmkin emes. Sońǵy jyldary Rıdder JEO eki ret ıesin aýystyrǵan, al jańa menshik ıesinde aldyńǵy qarjylyq esep-qısap týraly tolyq aqparat joq, - deıdi kásipkerler. 

Jaǵdaıdy qıyndatyp otyrǵan taǵy bir faktor – JEO-nyń abonenttik bólimindegi kassalyq apparat uzaq ýaqyt boıy tabys esebi júıesine qosylmaǵan. Sonyń saldarynan kásipkerlerdiń birqatar tólemi resmı túrde kórinbeı, «vırtýaldy qaryzdardyń» paıda bolýyna ákelip soqqan. 

Salyq organdary kásipkerlerdiń shottaryn sebepsiz buǵattamaıtynyn, ár jaǵdaıdy jeke qaraýǵa daıyn ekenderin málimdedi. Alaıda bıznes ıeleri qazir úsh topqa bólinip otyr: tólemin dáleldeı alatyndar, qaryzyn moıyndaıtyndar jáne eshqandaı qujaty joqtar.

– Kásipkerler ózderi yqpal ete almaıtyn júıelik qateler úshin jaýap bermeýi tıis. Sondyqtan ShQO Kásipkerler palatasy jylý júıesindegi aqaýlar, JEO-nyń ıesiniń birneshe ret aýysýy jáne esep júrgizýdegi olqylyqtar saldarynan qındyqqa tap bolǵandar úshin jeke retteý tetigin ázirleý týraly usynyspen Memlekettik kirister komıtetine júginedi, - dedi keńes tóraǵasy Igor Shatskıı.

Eske salsaq, osyǵan deıin Rıdderde shý shyqqan mektepti arnaıy komıssııa tekseretini habarlanǵan.