Rıdderlik jeńil atlet Qazaqstannyń jańa rekordyn ornatty
ASTANA. QazAqparat - Óskemendegi Olga Rypakova atyndaǵy jeńil atletıka manejinde sporttyń atalmysh túrinen jabyq keshendegi Qazaqstan Respýblıkasy Kýboginiń II kezeńi ótip jatyr, dep habarlaıdy QazAqparat ShQO dene shynyqtyrý jáne sport basqarmasyna silteme jasap.
Áıelder arasyndaǵy 400 metr qashyqtyqqa júgirý saıysynda rıdderlik Elına Mıhına óziniń qarsylasy Svetlana Golendovadan Tegerandaǵy Azııa chempıonatynda ketken qarymtasyn qaıtardy. Elına Óskemendegi jarysta óziniń qarsylasyn jeńip qana qoımaı, 52,53 sekýnd kórsetkishimen Qazaqstannyń jańa rekordyn ornatty. Bir-birine des bermeı kele jatqan qos myqty básekelestiktiń arqasynda álemdik normatıvti oryndap tastady.
Saıysqa Qazaqstannyń barlyq oblystarynan bólek, Qyrǵyzstannan da jeńil atletter keldi. Eki kúnge sozylatyn báseke barysynda jeńil atletıkanyń 16 baǵyty boıynsha úzdikter anyqtalatyn bolady.
«Bul jarys sportshylardyń tájirıbe jınaqtaýlaryna úlken múmkindik. QR Kýbogin biz úsh kezeńge bóldik, árqaısysynda qatysýshylar Álem chempıonatynda baq synaýǵa joldama ıelený úshin normatıvter oryndaı alady», - dedi jarystyń bas tóreshisi Aleksandr Krýglov.
Týrnır jeńimpazdary 1-3 naýryz aralyǵynda Anglııanyń Bırmıngem qalasynda ótetin jabyq ǵımarattaǵy Álem chempıonatyna qatysady.
