Rıdderden shyqqan Bethoven

ÓSKEMEN. QazAqparat - Bıyl 4-synypty bitirgen rıdderlik Sanjar Saǵyndyqovtyń álemge áıgili nemis kompozıtory Lıýdvıg Van Bethoven sekildi estý qabileti nashar bolsa da, mýzykaǵa degen qushtarlyǵy ǵalamat, dep jazady «Egemen Qazaqstan» gazeti. 

Arnaıy qurylǵy kómegimen daýystyń 50 paıyzyn ǵana estıtin 11 jastaǵy talantty búldirshin fortepıano men gıtarada qatar oınaıdy eken. 

Ata-anasy onyń qulaǵy durys estimeıtinin 4 jasynda bilipti. Mýzykaǵa qyzyǵýshylyǵyn 6 jasynda ańǵaryp, qaladaǵy mýzyka mektebine beripti. «Ulymyz birinshi synypta júrgende 5-synypqa arnalǵan Bethovenniń «Elızaǵa» degen shyǵarmasyn fortepıanoda oınady. Bul mýzykany bir jerden estigen bolýy kerek: «Osy mýzykada oınaǵym keledi» dep ótindi bizge. Birden notasyn taýyp, qaǵazǵa shyǵaryp berdik. Lezde úırenip aldy. Oqytýshysy buǵan qatty tańyrqady», deıdi balǵyn mýzykanttyń anasy Sánııa.

 Sanjar osy ýaqytqa deıin oblys, respýblıkany qoıyp, halyqaralyq baıqaýlarǵa da qatysyp úlgeripti. Latıf Hamıdı atyndaǵy halyqaralyq baıqaýdyń úsh márte Gran-prıin ıelenipti (ekeýi - fortepıanodan, bireýi gıtaradan). 2016, 2017 jyldary Reseıdiń Barnaýl qalasynda ótken gıtarashylar baıqaýynda I jáne II oryndardy jeńip alyp, teriskeıdegi kórshilerimizdi ónerimen tánti etipti. «Rýhanı jańǵyrý» baǵdarlamasy aıasynda uıymdastyrylǵan «Tańǵy shuǵyla» baıqaýynyń oblystyq,  respýblıkalyq kezeńderinde de top jarypty. Bıyl Býrabaıda bolǵan «Burabay Summer Fest» halyqaralyq baıqaýynda 400 balanyń ishinen I oryndy qanjyǵasyna baılap, AQSh-tyń Los-Andjeles qalasyna joldama bergen Gran-prıge qol sozym jerden qaıtypty.

«Bizdiń balamyz qulaǵy 50 paıyz estise de, deni saý balalarmen birge túrli óner saıystaryna qatysyp júr. Biraq jeńildik jasap, elep-eskerip jatqan eshkim joq», - deıdi Sanjardyń anasy. Rıdder qalasyndaǵy fızıka-matematıka mektebinde oqıtyn ónerli óren óziniń mýzykalyq qabiletin kúnnen kúnge ushtap, jastyǵyna, estýiniń nasharlyǵyna qaramastan kúrdeli shyǵarmalardy tez ıgerip alatyn kórinedi. Tipti bar-joǵy 10-15 mınýtta notalardy oqyp, shedevr týyndylardy jarty saǵatta úırenip alady eken. Fortepıano men gıtaranyń qulaǵynda oınaıtyn oqýshynyń áke-sheshesi qarapaıym. Ekeýi de temirjolda jumys isteıdi.



«Sanjardyń eki armany bar. Eki jylda bir ret ár elde ótip otyratyn Chaıkovskıı atyndaǵy baıqaý men  ózimizdiń elordada ótip júrgen jas pıanısterdiń «Astana Piano Passion» halyqaralyq festıval-baıqaýyna qatysqysy keledi. Ásirese Denıs Matsýevti bir kórip, júzdesýdi qatty armandap júr», - deıdi ónerpaz balanyń ákesi Talǵat Saǵyndyqov.

«Sanjardy emdetý oılaryńyzda joq pa?» degen saýalymyzǵa ata-anasy: «Nerv júıesi jansyzdanyp qalǵan deıdi. Eshqaıda aparyp, durystap tekserýden de ótkizgen joqpyz» dep jaýap berdi. Bálkim, emdetýge múmkindikteri bolmaı jatyr ma? Ol jaǵyn ashyp aıtpady.

Talant - memleket baılyǵy. Endeshe, aldaǵy ýaqytta talantty balǵyndy shet elge jiberip, emdetý jaǵyn da oılastyrý kerek bolar.