Rıdderdegi jylý ortalyǵynda taǵy da apat boldy
ÓSKEMEN. QazAqparat – Shyǵys Qazaqstan oblysynyń Rıdder qalasyndaǵy jylý elektr ortalyǵynda taǵy da apat boldy, dep habarlaıdy QazAqparat tilshisi.
Qala ákimdiginiń málimetine súıensek, jylý elektr ortalyǵyndaǵy apat 28 aqpanda saǵat 3.45-te bolǵan.
«№1 jáne №2 qazandyq apattyq jaǵdaıda óshirildi. Al, sol ýaqytta №3 jáne №4 qazandyq qana jumys istep turdy. Qazir №2 qazandyqty jóndeý jumystary aıaqtalyp, ol iske qosyldy. №1 qazandyq ta qalypqa keltirilip, qosylýǵa daıyndalyp jatyr», - deıdi shahar basshysy Dmıtrıı Gorkovoı.
Eske salsaq, 5 qarasha kúni saǵat 20:00-de Rıdderdegi JEO-da kúl shyǵarý júıesindegi sorǵy isten shyǵyp, №1 qazandyq agregatynyń qosalqy jabdyǵy apatty jaǵdaıda ajyratylǵan bolatyn. Sonyń saldarynan 22 myńnan astam abonent úshin jylý berý azaıtyldy.
Rıdder turǵyndary JEO-ny kommýnaldyq menshikke qaıtarý týraly petıtsııa jazdy.
Qańtar aıynyń aıaǵynda ortalyq ıesiniń aýysqany belgili boldy.
16 aqpan kúni Rıdderdegi tótenshe jaǵdaı rejımi alynyp tastalǵan bolatyn.
