Rıdderdegi jylý ortalyǵynda taǵy apat boldy

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynda taǵy apat boldy, dep habarlaıdy QazAqparat tilshisi.

Qala ákimdiginiń málimetine súıensek, 18 sáýirge qaraǵan túni jylý elektr ortalyǵyndaǵy qazandyqtardyń biri apatty jaǵdaıda isten shyqqan.

«Joǵary qysymdy qazandyq apatty jaǵdaıda óshirildi. Shuǵyl túrde rezervtik qazandyq iske qosyldy. Endi jylý júıesindegi temperatýra birtindep kóteriledi», - delingen aqparatta.

Osy rette, QazAqparat tilshisi Rıdder turǵyndaryn sózge tartyp kórdi.

«Qazir úılerimizde jylý joq. Dalada aýa temperatýrasy da tómendep ketti. Tezirek jylý qosylsa eken», - deıdi Baqytgúl esimdi qala turǵyny.

Eske salsaq, osyǵan deıin Rıdderdegi jylý elektr ortalyǵyn kommýnaldyq menshikke berý týraly kelissóz júrip jatqany habarlanǵan.