Rıdderdegi jylý ortalyǵynda taǵy aqaý shyqty
Keshe rıdderlikterdiń úıleri taǵy da sýyp ketti. Buǵan jylý elektr ortalyǵyndaǵy jańa qondyrǵynyń isten shyǵýy sebep bolǵan.
Atalǵan qondyrǵy osydan birneshe apta buryn órt shyqqannan keıin qaıta qalpyna keltirilgen kómir traktyna ornatylǵan bolatyn.
«5 aqpanda 2 konveıer taspasyn kóteretin baraban qozǵaltqyshy isten shyqty. Jóndeý jumystary aıaqtaldy. Kómir býnkerlerin toltyrý bastaldy. Jóndeý jumystary kezinde temperatýralyq rejımdi qalpyna keltirý úshin №1 qazandyq qondyrǵysy qosymsha qyzdyryldy», - deıdi qala ákimi Dmıtrıı Gorkovoı.
Eske salsaq, 19 qańtarda Rıdderdegi jylý elektr ortalyǵynan órt shyqqan bolatyn.
Qyzyl jalyn birneshe saǵattyń ishinde aýyzdyqtaldy.
Keıinnen jylý elektr ortalyǵynyń basshylyǵyna qatysty tergeý júrgizilip jatqany habarlandy.
Sondaı-aq Danıal Ahmetov Rıdder jylý elektr ortalyǵyndaǵy aqaýlar men apattardan úıleri qaıta-qaıta sýyp ketip otyrǵan turǵyndardan keshirim suraǵan edi.
25 qańtarda jylý elektr ortalyǵynda órt saldaryn joıý jumystary aıaqtalǵanyn jazdyq.
Foto: tets.kz