Rıdderdegi jylý ortalyǵynda eki kúnde 3 aqaý shyqty

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynda eki kúnde 3 aqaý shyqty, dep habarlaıdy QazAqparat tilshisi.

«Rıdder JEO» AQ málimetine súıensek, birinshi aqaý 22 sáýir kúni shyqqan.

«Otyn berý traktynda aqaý bolyp, ony jóndeýge 9 saǵat ýaqyt ketti. Al 23 sáýirde №4 qazandyq apattyq jaǵdaıda óshirildi. Birden rezervte turǵan ekinshi qazandyq iske qosyldy. Biraq bes saǵattan keıin ekinshi qazandyqta da aqaý boldy. Mamandar shuǵyl túrde qalpyna keltirý jumystaryn qolǵa aldy», - delingen aqparatta.

25 sáýirde besinshi qazandyq qaıta iske qosylǵan. Qazir ortalyqta eki orta qysymdy qazandyq jumys istep tur.

Aıta keteıik, Rıdderde jylý maýsymy 29 sáýir kúni aıaqtalmaq.