Rıdderdegi jylý ortalyǵy «Óskemen jylý jelileri» AQ-ǵa berilmek
ShQO ákimdiginiń málimetine súıensek, jylý elektr ortalyǵy ótken ǵasyrdyń 50-shy jyldarynda salynǵan. Bıylǵy jylytý maýsymynda munda bolǵan 3 órt jáne 2 jarylys saldarynan kómir jetkizý joly buzylyp, jumysshylarǵa 267 tonna janarmaıdy qolmen jetkizýge týra kelgen edi. Qazir JEO kúrdeli jóndeýden ótýde. Barlyq jóndeý jumystary 15 qyrkúıekke deıin aıaqtalady dep josparlanýda.
«Qazir jóndeý jumystarynyń birinshi kezeńi bastaldy. Barlyq 6 qazandyq kúrdeli jóndeýdi qajet etedi. Ortalyqtaǵy túrli kúrdeli tehnıkalyq jabdyqtardy «Kaztsınkmash» zaýyty jóndeýden ótkizedi. Al qalǵan jabdyqtar ShQO-daǵy basqa zaýyttarda jóndelmek. Taǵy bir mańyzdy mindet – ǵımarattyń kontýryn jabý jáne jylýdyń syrtqa shyǵýyna jol bermeý. Úshinshi mindet – ishtegi shańdy joıý. Jumysshylar myna shań-tozańmen tynystamas úshin, ondaǵan jyldar boıy jumys istemegen jeldetkishti qalpyna keltirý qajet», - dedi oblys ákimi Danıal Ahmetov.
Budan bólek, Rıdderde sońǵy 5 jylda alǵash ret jylý jelilerine gıdravlıkalyq synaqtar júrgizilgen. Barlyǵy 3,3 shaqyrym qubyr aýystyrylady. Merdigerler jumys qarjylandyrylmaı jatyp iske kirisip ketti.
«Osylaısha, qazirdiń ózinde stantsııanyń barlyq 6 qazandyǵynda jóndeý jumystary júrgizilip jatyr. Bas merdiger – «Perspektıvnye tehnologıı-Qazaqstan» kompanııasy. Qazirgi ýaqytta jóndeý jumystaryna jalpy sany 128 adam jumyldyrylǵan», - dedi «Rıdder JEO» AQ bas dırektory Igor Mıhaılenko.
Jylý elektr ortalyǵynyń menshik nysanyna qatysty másele de sheshimin tabýǵa jaqyn.
«Ortalyqtyń memlekettik baqylaýǵa ótýin qamtamasyz etý jumystaryn júrgizip jatyrmyz. Ókinishke qaraı, bul nysandy óz mıllıardtaryna jóndeıtin ınvestor keledi degen úmit joq. Ondaı metsenat tabylmas. Sondyqtan biz jumys isteımiz. Bul JEO «Óskemen jylý jelileri» AQ quramynda bolady, kelisimshart jasaldy. Quqyqtyq máseleler sheshilýde», - dedi D.Ahmetov.
