Rıdderdegi jylý elektr ortalyǵyndaǵy aqaý: Úıler jylýǵa qaıta qosyldy
ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵy qaıta jumys isteýde, dep habarlaıdy QazAqparat tilshisi.
23 qazan kúni Rıdderdegi jylý elektr ortalyǵynda sapasyz mazýt saldarynan tótenshe jaǵdaı bolǵanyn habarlaǵan edik. Qazandyqtar jumysyn toqtatyp, halyq jylýsyz qalǵan.
Keshe ortalyqqa «Qaztsınk» JShS-nan jáne Óskemendegi JEO-dan qosymsha mazýt jóneltilgen bolatyn.
Qala ákimdiginiń málimetinshe, qazirgi ýaqytta úıler jylýǵa qaıta qosyldy.
«Aqaý bolǵan kezden bastap birden arnaıy jedel shtab qurylyp, másele baqylaýǵa alyndy. Ortalyqqa barlyǵy 190 tonna mazýt jetkizildi. Sonyń nátıjesinde, 3 qazandyq qaıtadan shtattyq rejımde jumys istep tur. Tórtinshi rezervtik joǵary qysymdy qazandyq ta qyzdyrylyp, iske qosylýda», - deıdi shahar ákimi Dmıtrıı Gorkovoı.
Onyń aıtýynsha, búgingi kúnniń ishinde úılerge qaıtadan ystyq sý keledi.
