Rıdderdegi jylý elektr ortalyǵyn kommýnaldyq menshikke berý týraly kelissóz júrip jatyr

ASTANA. QazAqparat – Shyǵys Qazaqstan oblysynyń ákimdigi Energetıka mınıstrliginiń qoldaýymen Rıdderdegi jylý elektr ortalyǵyn kommýnaldyq menshikke berý týraly kelissóz júrgizip jatyr, dep habarlaıdy QazAqparat tilshisi.

Bul jaıynda Energetıka mınıstri Almasadam Sátqalıev Úkimet otyrysynan keıin málim etti.

Mınıstr BAQ ókilderiniń suraǵyna bergen jaýabynda oblys ákimi Danıal Ahmetovtiń atalmysh nysandy kommýnaldyq menshikke alý máselesin tabandy túrde qoıyp otyrǵanyn aıtty.

«Óıtkeni ákimdik jańa menshik ıesiniń menedjment sapasyna kúmánmen qarap otyr. Qazirgi kezeńde ákimdik jańa menshik ıesimen bizdiń qoldaýymyz arqyly jylý nysanynyń aktıvin kommýnaldyq menshikke berý týraly durys baǵytta kelissóz júrgizip jatyr. Biraq, ekinshi jaǵynan ol jerde kóptegen zań buzý faktileri bar ekenin túsinip otyrmyz. Stansany osy kúıge jetkizgen basshylardyń jaýapkershilik máselesi bar. Ol stansany kelesi jylytý maýsymyna daıyndaý jumystary osy turǵydan júrip jatyr», - dedi mınıstr.