Rıdderdegi jol apaty: Óskemen ákimi aıyppul tólemeıtin boldy
ÓSKEMEN. QazAqparat - Búgin Óskemenniń mamandandyrylǵan ákimshilik soty Óskemen qalasynyń ákimi Qýat Tumabaevtyń aryzyn qarap, osyndaı sheshim shyǵardy, dep habarlaıdy QazAqparat tilshisi.
Esterińizde bolsa, jergilikti polıtsııa kólik quralyn saqtandyrý polısinsiz júrgizip, ákimshilik quqyqbuzýshylyq jasaǵany úshin Óskemen ákimine 10 AEK kóleminde aıyppul salǵan bolatyn. Qýat Tumabaev bul sheshimmen kelispeı, sotqa bergen-di.
Búgin oblystyq sotta ótken baspasóz máslıhatynda BAQ-pen jumys jónindegi úılestirýshi sýdıa Nazgúl Rahmetýllına iste ákimshilik quqyqbuzýshylyq quram joq bolǵandyqtan, sot polıtsııa qaýlysynyń kúshin joıǵanyn aıtty.
«Qýat Tumabaev kólik quralynyń ıesi emes, sondyqtan onyń is-áreketinde Ákimshilik quqyq buzý jónindegi kodekstiń 2-babynda qarastyrylǵan quqyqbuzýshylyq joq»,-dep atap ótti ol.
Eske sala keteıik, 16 shildede Rıdderde jol-kólik apaty oryn alyp, 19 jastaǵy Jenıa Smolnıkov qaza tapqan bolatyn. Rólde Rıdder qalasy ákiminiń orynbasary Baýyrjan Qurmanbaev bolǵan. Oǵan qatysty sot 1 jylǵa qonys kolonııasynda jazasyn óteý týraly úkim shyǵarǵan. Al onyń janynda otyrǵan Óskemen qalasynyń ákimi Qýat Tumabaev kólik apatynan keıin Qurmanbekovtyń kóligine otyryp, ketip qalǵan. 16 maýsym kúni polıtsııa oǵan qatysty ákimshilik hattama toltyrdy. Oǵan «saqtandyrý polısinsiz kólik júrgizgeni úshin» 10 AEK kóleminde aıyppul salynǵan edi.
