Rıdderdegi JEO-da órt saldaryn joıý jumystary jalǵasýda

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynda órt saldaryn joıý jumystary jalǵasýda, dep habarlaıdy QazAqparat tilshisi.

ShQO ákimdiginiń málimetine súıensek, Rıdderde úılerge jylý turaqty berilip jatyr. Órt shyqqan otyn tsehyn qalypqa keltirý júrip jatyr.

«Qazirgi ýaqytta jylý elektr ortalyǵynda úılerdi jylýmen qamtamasyz etýge qajetti otyn qory bar. Mazýt ta ázirge jetkilikti. Eki qazandyqqa kómir kólemin arttyryp otyrmyz. Bul qazandyqtar aralas, ıaǵnı mazýt jáne kómirmen jaǵylýda. Al qalǵan qazandyqtar tek mazýtpen ǵana jumys isteıdi», - deıdi oblys ákiminiń orynbasary Erjan Nurbaev.

Onyń aıtýynsha, jylý elektr ortalyǵyndaǵy kómir qory - 20 myń tonnadan asady.

Eske salsaq, 19 qańtarda Rıdderdegi jylý elektr ortalyǵynan órt shyqqan bolatyn.

Birneshe saǵattyń ishinde qyzyl jalyn aýyzdyqtaldy.

Keıinnen jylý elektr ortalyǵynyń basshylyǵyna qatysty tergeý júrgizilip jatqany habarlandy.

Sondaı-aq oblys ákimi Danıal Ahmetov Rıdder jylý elektr ortalyǵyndaǵy aqaýlar men apattardan úıleri qaıta-qaıta sýyp ketip otyrǵan turǵyndardan keshirim suraǵan edi. Aıtýynsha, mundaı jaǵdaı ortalyq basshylyǵynyń jaýapsyzdyǵynan bolyp otyr.