Rıdderdegi tótenshe jaǵdaı: Jylý ortalyǵyndaǵy qazandyqtardy jóndeýge reseılik mamandar tartyldy
ShQO ákimi Danıal Ahmetov jumys saparymen Rıdder qalasyna baryp, jylý elektr ortalyǵyndaǵy jóndeý jáne qalpyna keltirý jumystarynyń barysymen tanysty.
«Barlyǵy bekitilgen kestege sáıkes júrgizilýde. Qazir úsh qazandyq jumys istep tur, bireýi - joǵary qysymdy. Tórtinshi qazandyq agregatyn jóndeý aıaqtaldy, iske qosý jáne retteý jumystary júrip jatyr. Besinshi qazandyqtyń jabdyqtary jóndelýde», - deıdi aımaq basshysy.
Belgili bolǵandaı, Rıdder jylý elektr ortalyǵynyń barlyq jabdyqtary óte tozǵan. Onyń ıeleri nysandy qaýipti jaǵdaıǵa deıin jetkizgen. Jylytý maýsymyna birde-bir qazandyq qondyrǵysy daıyn bolmaı shyqty.
«Qazirgi tańda bizdiń mamandar elektr jabdyǵyn jóndeýden bastap dánekerleý jumystaryna deıin barlyǵyn isteýde. Olarǵa Reseıdiń Qazan qalasynan kelgen energetıkter belsendi túrde kómek kórsetýde. Osylaısha, jańartylǵan úsh joǵary qysymdy qazandyq qatań aýa raıy jaǵdaıynda temperatýra rejımin saqtaýǵa múmkindik beredi. Ortalyqty satyp alý nemese kommýnaldyq menshikke berý týraly ıelerine eki ret júgindim. Bul bastama QR Úkimeti deńgeıinde maquldandy», - deıdi Danıal Ahmetov.