Rıdderdegi tótenshe jaǵdaı: Jylý elektr ortalyǵyndaǵy eki qazandyq áli jóndelip jatyr
ShQO ákimdiginiń málimetine súıensek, Rıdderdegi jylý elektr ortalyǵyn qalypqa keltirý jumystary aıaqtalýda. Jaǵdaı oblys ákiminiń jeke baqylaýynda.
«Ortalyqtaǵy jabdyqtardyń durys jumys isteýin qadaǵalaý asa mańyzdy. Ókinishke qaraı, qazir tek tórt qazandyq jumys istep tur. Úsheýi ortasha jáne bireýi joǵary qysymdy. Eki qazandyq agregaty jóndelýde. №4 qazandyqta iske qosý-retteý jumystary júrgizilýde. 25 qarashada ol tolyq iske qosylady dep josparlanýda. №5 qazandyq tolyǵymen tekserilip, qajetti jabdyqtarmen jabdyqtalǵan jáne 5 jeltoqsanda jylytý júıesine qosylady, - deıdi aımaq basshysy Danıal Ahmetov.
Onyń aıtýynsha, apatqa deıin JEO-da qajetti 75 jumysshynyń tek 29-y jumys istegen. Qazir qyzmetkerler jumysqa qabyldanyp, tolyqtaı jınaqtaldy.
«JEO-da 130 adam turaqty jumys istep jatyr, olardyń arasynda Óskemen qalasynyń mamandary da bar. Barlyq týyndaǵan aqaýlar tez arada joıylady. Kómir jetkizý jolǵa qoıylǵan. Ortalyq basshylyǵy qazandyqtardy jóndeýdi tek 2023 jyldyń aqpanynda júrgizbekshi bolǵan. Bul kúrdeli máseleler týyndatar edi», - dedi ShQO ákimi.