Rıdderdegi tótenshe jaǵdaı: Jylý elektr ortalyǵyn retteý jumystary jalǵasýda

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵyn qalypqa keltirý jumystary jalǵasýda, dep habarlaıdy QazAqparat tilshisi.

ShQO ákimdiginiń málimetine súıensek, Rıdderdegi jylý elektr ortalyǵynda bolǵan tótenshe jaǵdaı saldaryn joıý úshin mamandar sol jerde 4 táýlik boıy úzdiksiz jumys isteýde.

- Óńirdiń iri ónerkásiptik jáne kommýnaldyq kásiporyndarynyń qyzmetkerleri JEO-ny birqatar ýchaskege bóldi. Árbir maman óz ýchaskesinde jabdyqtyń jaı-kúıine aýdıt júrgizýde jáne qajetti jumystar boıynsha usynystardy aıtýda. «Rıdder JEO» basshylyǵy jabdyqtar jumysyndaǵy aqaýlardy anyqtaý úshin esh shara qoldanbaǵan. Sondyqtan «Kaztsınk» JShS, «Óskemen jylý jelileri» AQ, «Óskemen JEO», «Kazvzryvprom», ShQ AEK-den shaqyrylǵan mamandarǵa olardyń jumysyn isteýge týra kelýde, - deıdi oblys ákimi Danıal Ahmetov.

Ortalyq búgin úılerdi turaqty jylýmen qamtamasyz etedi. Al 15 qarashaǵa deıin JEO jumysyn tolyǵymen turaqtandyrý josparlanyp otyr.

Aıta keteıik, JEO-dan basqa, qalada úzdiksiz energııamen jabdyqtaýdy qamtamasyz etýdi qadaǵalaıtyn 12 mobıldi energııa brıgadasy quryldy.