Rıdderdegi tótenshe jaǵdaı: JEO-nyń jylytý maýsymyna daıyndyǵy durys tekserilmegeni anyqtaldy

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynyń jylytý maýsymyna daıyndyǵy durys tekserilmegeni anyqtaldy, dep habarlaıdy QazAqparat tilshisi.

ShQO ákimi Danıal Ahmetov qalalar men aýdandardyń ákimderimen jylý máselesi boıynsha jınalys ótkizdi. Oǵan Energetıka mınıstrligi Atomdyq jáne energetıkalyq qadaǵalaý men baqylaý komıteti aýmaqtyq departamentiniń ókili qatysty. Belgili bolǵandaı, sáýir aıynan qyrkúıekke deıingi aralyqta osy vedomstvonyń mamandary Rıdder jylý elektr ortalyǵyna barmaǵan.

«Alaıda 15 qyrkúıekte olar mınıstrlikke hat joldap, ortalyqtyń jylytý maýsymyna tolyq daıyn ekendigi týraly habarlady. Búginde departament Rıdder JEO basshylyǵy 4 jáne 5 qazandyq agregattarynyń jóndelgeni týraly teris aqparat joldaǵanyn málimdep otyr. Osydan-aq atalǵan vedomstvo ózderiniń dármensizdigi men nemquraılylyǵyn kórsetti deýge bolady. Ózge energetıkalyq obektilerdi de qalaı tekserip, baǵa beretini kúmán týdyrady», - dedi Danıal Ahmetov.

Onyń aıtýynsha, departament mamandarynyń áreketsizdiginen búkil qala qys mezgilinde jylýsyz qalý qaýpine ushyrady.

«Mundaı nemquraıly sheneýnikter memlekettik qyzmette bolmaýy kerek. Mınıstrlik tıisti shara qabyldaıdy degen oıdamyn», - dedi oblys ákimi.