Rıdderdegi tótenshe jaǵdaı: JEO basshylyǵy jaýapqa tartylýy múmkin

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynyń basshylyǵy jaýapqa tartylýy múmkin, dep habarlaıdy QazAqparat tilshisi.

ShQO ákimi Danıal Ahmetov Rıdderdegi jylý elektr ortalyǵynda jedel shtabtyń otyrysyna qatysty. Onyń aıtýynsha, ortalyq basshylyǵy apatty jaǵdaıdy joıý boıynsha eshqandaı shara qoldanbaǵan. Shtab mamandary qazandyq agregattarynda apattyq-qalpyna keltirý jumystarynyń jedeldetilgen josparyn qurdy.

«Qalany jylýmen jabdyqtaýdy qalpyna keltirý jónindegi is-sharalardyń egjeı-tegjeıli jospary bar. Qazir 3 qazandyq iske qosyldy. Sýdyń temperatýrasy 60 gradýstan asady, turǵyn úıler aıtarlyqtaı jylydy.

№6 joǵary qysymdy qazandyqta jóndeý jumystary júrip jatyr. Tıisti synaqtardan keıin ol jylý júıesine qosylady.

Sondaı-aq iske qosylatyn №4 qazandyq ta kúrdeli jóndeýden ótti.

Al №5 qazandyqty jóndeýge biraz ýaqyt ketedi. Munda elektr kabel jelilerin qalpyna keltirý jumystary júrgiziledi. JEO basshylyǵy bolsa birde-bir qazandyq agregatyn jóndegen joq», - dedi aımaq basshysy.

Danıal Ahmetovtiń aıtýynsha, qazir QR Energetıka mınıstrliginiń Atom jáne energetıkalyq qadaǵalaý jáne baqylaý komıteti «Rıdder JEO» AQ basshylyǵyn jaýapkershilikke tartý máselesin qarastyrýda.

Aıta keteıik, búginde ortalyqtaǵy jóndeý jumystaryn 13 merdiger uıymnan tartylǵan 130 adam júrgizýde.

Eske salsaq, 5 qarasha kúni saǵat 20.00-de atalǵan ortalyqtaǵy kúl shyǵarý júıesindegi sorǵy isten shyǵyp, №1 qazandyq agregatynyń qosalqy jabdyǵy apatty jaǵdaıda ajyratylǵan bolatyn. Sonyń saldarynan 22 myńnan astam abonent úshin jylý berý azaıtyldy.

Tótenshe jaǵdaıǵa baılanysty qaladaǵy mektep oqýshylary 11 qarashaǵa deıin qashyqtan oqydy.

10 qarasha kúni Rıdderdegi jylý elektr ortalyǵynda taǵy da apat boldy.

14 qarashada jylý elektr ortalyǵyn qalpyna keltirý jumystary kestege saı júrip jatqany habarlandy.