Rıdderdegi tótenshe jaǵdaı: Turǵyndar jylý aqysyn qalaı tóleıdi

ÓSKEMEN. QazAqparat – Shyǵys Qazaqstan oblysy Rıdder qalasynyń turǵyndary jylý aqysyn qalaı tóleıtindigi týraly másele qaralýda, dep habarlaıdy QazAqparat tilshisi.

Ulttyq ekonomıka mınıstrligi Tabıǵı monopolııalardy retteý komıteti ShQO boıynsha departamentiniń málimetine súıensek, Rıdder qalasynyń turǵyndaryna jylý aqysyn esepteý máselesi qaralyp jatyr.

«Zańǵa sáıkes tabıǵı monopolııalar sýbektisi jetkizilmegen jylý energııasyna qaıta esepteý júrgizýge mindetti. Jylý energııasyn paıdalaný erejelerinde kórsetilgendeı, eger jylý kózi sapaly energııamen qamtamasyz etilmese, onda menshik ıeleriniń birlestigi jabdyqtaýshy mekemege habarlasyp eskertýi kerek», - deıdi departament basshysy Arman Málik.

Onyń aıtýynsha, eger kompanııa qaıta esepteýden bas tartsa, tutynýshylar monopolııaǵa qarsy vedomstvoǵa shaǵymdana alady.

«Qazirgi ýaqytta departament mamandary Rıdder qalasynyń turǵyndaryna jylýdy qaıta esepteýge qatysty máseleni zerdeleýde. Jylý elektr ortalyǵynan aqparat alyp, qaıta tekserip, jergilikti ákimdikpen birlese jumys istep jatyrmyz. Esepteýler júrgizildi, biraq ázirge naqty soma bekitilgen joq», - deıdi A. Málik.