Rıdderdegi tótenshe jaǵdaı: Turǵyndar úıleriniń qaıta sýyp ketkenin aıtyp shaǵymdanýda

ÓSKEMEN. QazAqparat – Shyǵys Qazaqstan oblysy Rıdder qalasynyń turǵyndary úıleriniń qaıta sýyp ketkenine shaǵymdanýda, dep habarlaıdy QazAqparat tilshisi.

Qańtar aıynyń 11-nen beri rıdderlikter úıleriniń qaıta sýyp ketkenin aıtyp, shaǵymdanyp jatyr. Osy rette, jylý elektr ortalyǵynyń basshylyǵy buǵan ne sebep bolǵanyn túsindirdi.

«Temperatýranyń tómendeýi qosalqy elektr jabdyqtaryn shuǵyl jóndeýge baılanysty ortasha qysymdy eki qazandyqtyń ýaqytsha toqtatylýynan boldy. Qazirgi ýaqytta aqaýlar joıylyp, ortasha qysymdy qazandyqtardy iske qosý jumystary júrgizilýde», - dep habarlady «Rıdder JEO» AQ-dan.

Usynylǵan málimetke súıensek, qazir JEO-da bir orta qysymdy №2 qazandyq jáne joǵary qysymdy eki №4 jáne №5 qazandyq jumys istep tur.