Rıdderdegi tótenshe jaǵdaı: mamyrda jylý ortalyǵyn rekonstrýktsııalaý bastalmaq

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵyn rekonstrýktsııalaý jumystary 2023 jyldyń mamyr aıynda bastalady, dep habarlaıdy QazAqparat tilshisi.

ShQO ákimi Danıal Ahmetov jumys saparymen Rıdder qalasyna baryp, jylý elektr ortalyǵyn qalpyna keltirý jumystarynyń barysymen tanysty.

«Qazir ortalyqta №5 qazandyqty jóndeý jáne iske qosý jumystary aıaqtaldy. Jeksenbi kúni ol ystyq rejımge engiziledi. Osy sátte stantsııada úsh qazandyq turaqty jumys istep tur. Jelidegi temperatýra – 75 gradýs. Segiz medıtsınalyq mekemege Almatyda jasalǵan qosymsha elektr qazandyqtary ornatylyp jatyr. Bul júıedegi sýdy júz gradýsqa deıin qyzdyrýǵa jáne JEO-ǵa qosymsha júktemesiz áleýmettik nysandardy jylýmen qamtamasyz etýge múmkindik beredi», - dedi aımaq basshysy.

Onyń aıtýynsha, 15 jeltoqsanǵa deıin bul jabdyq barlyq aýrýhanada, al osy aıdyń 23-ine deıin 4 bilim berý mekemesine ornatylmaq.

«Sondaı-aq, tótenshe jaǵdaı kezinde rezervte bolǵan eki qazandyqty jóndeý josparlanǵan. Mamyr aıynda kelesi jylytý maýsymynda osyndaı másele bolmaý úshin Rıdder JEO-ny tolyqtaı rekonstrýktsııalaýdy bastaımyz. Qazir mazýt pen kómir qory jetkilikti. Kún saıyn 15 vagon qatty otyn jetkizilip tur», - dedi Danıal Ahmetov.