Rıdderdegi ortalyqtyń jylytý maýsymyna daıyndyǵy qandaı

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynyń jylytý maýsymyna daıyndyǵy 40 paıyz, dep habarlaıdy QazAqparat tilshisi.

Ótken qysta qaıta-qaıta aqaý shyqqan Rıdderdegi JEO-da kúrdeli jóndeý jumystary júrgizilip jatyr. Qala ákimdiginiń málimetine súıensek, búginde ortalyqtyń aldaǵy jylytý maýsymyna daıyndyǵy 40 paıyz bolyp otyr.

«Jóndeý jumystaryn 11 merdiger kompanııa júrgizip jatyr. Jumysshylar kún saıyn 2 aýysymda eńbek etedi. Barlyq 6 qazandyq qaıta jańartylyp jatyr. Al jylý jelilerindegi jumystardyń 90 paıyzy aıaqtaldy», - delingen aqparatta.

Atqarylyp jatqan jumystardyń sapasy qatań baqylaýda. Aptasyna eki ret jergilikti máslıhat depýtattary men qoǵam belsendileri ortalyqqa baryp, tekserý júrgizip turady.

Eske salsaq, osyǵan deıin Óskemendegi jylý ortalyǵynda byltyr aqaý shyqqan qazandyq kúzde jóndelip bitetinin habarlaǵan edik.