Rıdderdegi órt kezinde 90 adam evakýatsııalandy
RIDDER. QazAqparat — Shyǵys Qazaqstan oblysynda kóp qabatty turǵyn úıden shyqqan órt kezinde 90 adam evakýatsııalandy, dep habarlaıdy QazAqparat tilshisi ShQO Tótenshe jaǵdaılar departamentiniń (TJD) baspasóz qyzmetine silteme jasap.
TJD-dan habarlaǵandaı, 17 mamyrda saǵat 3-te Rıdder qalasynyń órt sóndirý qyzmetine toǵyz qabatty turǵyn úıdiń 8-qabatynda páter janyp jatqany týraly habar túsken.
«Er adam kórshi páterden dybystar estigen. Qabyrǵa qatty ystyq bolǵan. Sondyqtan ol TJ basqarmasyna habarlasqan. Órt sóndirýshiler oqıǵa ornyna 3 mınýtta jetip, adamdardy evakýatsııalaı bastaǵan. Barlyǵy 90 adam evakýatsııalandy, sonyń ishinde 15-i balalar», - dep túsindirdi TJD baspasóz qyzmeti.
Órtenip jatqan páterde eshkim bolmaǵan, sondyqtan órt sóndirýshiler polıtsııa qyzmetkerleri bolǵan kezde esikti buzyp kirgen. Kireberis pen bir bólme janyp jatqan. Páterdegi órt 20 mınýtta sóndirildi, 22 sharshy metrdi sharpyǵan.
Órttiń shyǵý sebebi anyqtalyp jatyr. Órt sóndirýshiler oblys turǵyndaryna úıden ketip bara jatqan kezde barlyq elektr jabdyqtaryn sóndirý kerektigin eske saldy.
Avtory: Oral Erlanuly
