Rıdderdegi órt: Baspanasyz qalǵandarǵa jazdyń sońyna deıin jańa úı beriledi
RIDDER. QazAqparat – Shyǵys Qazaqstan oblysynda alapat órtten baspanasyz qalǵandarǵa jazdyń sońyna deıin jańa úı beriledi, dep habarlaıdy QazAqparat tilshisi.
Aımaq basshysy Danıal Ahmetov tilsiz jaýdan zardap shekken Rıdder turǵyndarymen kezdesti. Óz sózinde ol tamyz aıynyń sońyna deıin baspanasyz qalǵandardyń árqaısysyna jańa úıdiń kilti beriletindigin jetkizdi. Bes qurylys kompanııasy Botanıka yqshamaýdanynda jeti úıden turǵyzady.
Qazir oqıǵa ornynda komıssııa músheleri jumys isteýde. Olar naqty keltirilgen materıaldyq zalal mólsherin eseptep, azamattarǵa qujattaryn qalpyna keltirýge septigin tıgizedi.
«Buzylǵan úılerdi qalpyna keltirmeımiz. Úıinen aıyrylǵan ár adamǵa 80 sharshy metrlik baspana beriledi. Áýelde qurylysy aıaqtalmaǵan 9 qabatty turǵyn úıdi satyp alý josparlanǵan bolatyn. Alaıda 1996 jylǵy úıdiń ishi árlenbegen ári qajetti kommýnıkatsııa tartylmaǵan. Onyń ıesi sharshy metri úshin 179 myń teńge surap otyr. Al jeke sektordaǵy jańa úıdiń sharshy metriniń quny – 160 myń teńge. Bul bıýdjet qarjysyna da únem bolady. Úıler turǵyndarǵa esh aqysyz beriledi», - dedi Danıal Ahmetov.
Qazirgi kezde sáýletshiler 35 úı aýmaǵyn bólýde, sosyn birden qurylys jumystary bastalmaq.
Esterińizge sala ketsek, 10 mamyr kúni ShQO-daǵy Rıdder orman sharýashylyǵynda órt shyqty. Dala órti 310 gektar aýmaqty sharpyp, 1 adam qaza tapty. Órtke baılanysty shuǵyl jeli iske qosyldy. Memleket basshysy Qasym-Jomart Toqaev Úkimet pen Shyǵys Qazaqstan oblysynyń ákimdigi órtten zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy. Polıtsııa qyzmetkerleri órtke qatysty kúdiktini ustady.