Rıdderdegi qatty qaldyqtar polıgonynyń paıdalanylý merzimi uzartyldy
ASTANA. QazAqparat - Rıdderde qatty turmystyq qaldyqtardyń polıgonyn paıdalaný merzimin uzartty, qazir qoqysty suryptaý boıynsha jumystar júrgizilip jatyr. Bul jóninde Óńirlik kommýnıkatsııalar qyzmetinde qala ákimi Jomart Muratov aıtty, dep habarlaıdy QazAqparat tilshisi aqparattyq ortalyqqa silteme jasap.
Ákimniń aıtýynsha, qazirgi ýaqytta Rıdder qalasynyń mańaıynda jalpy aýmaǵy 18 gektardy quraıtyn qatty turmystyq qaldyqtardyń polıgony bar. Alaıda buryn jabylýǵa shaq qalǵan. Polıgonnyń qoldanylý merzimi 2019 jyly aıaqtalýy kerek.
Qazirgi tańda memlekettik-jekemenshik áriptestik baǵdarlamasynyń arqasynda «Fırma Etalon» JShS qatty qaldyqtar polıgonyn 2025 jylǵa deıin paıdalanýǵa ruqsat aldy. Qoldanylý merzimin uzartý týraly másele negizsiz bolǵan joq, sebebi tabıǵı sý aǵyndarynyń kóp mólsherinen qalada jańa polıgondy salatyn jer tapshy.
Sondaı-aq, kásipker qatty turmystyq qaldyqtardy suryptaý tsehynyń qurylysynyń jobasyn ázirledi. Tsehqa arnalǵan jabdyqtar 28 mln teńgege satyp alyndy.
«QR Prezıdenti Nursultan Nazarbaevtyń Joldaýy aıasynda biz memlekettik-jekemenshik áriptestikti damytyp jatyrmyz. Joba saraptamanyń barlyq túrlerinen ótti. Qazir qurylysqa ruqsattama alýdyń qamymen júrmiz. Jazda tsehtyń qurylysy bastalady, kelesi jyldyń basynda aıaqtaımyz dep josparlap otyrmyz», - dedi Rıdder qalasynyń ákimi Jomart Muratov.
QTQ-ny suryptaý 40% astam qaldyqtardy qaıta óndeýge jiberýge múmkindik beredi.
