Rıdderdegi karerdi sý basyp qalý qaýpi tónip tur
ÓSKEMEN. QazAqparat - «Qazmyrysh» mamandary kompanııanyń Rıdder taý-ken baıytý keshenine tıesili Rıdder-Sokolnyı ken ornyndaǵy Andreevskıı kareriniń soltústik-batys jıegin sý shaıyp ketpeý úshin aldyn alý jumystaryn jalǵastyrýda. 6 mamyrda sý tasqyny saldarynan atalmysh karerdiń qabyrǵasy opyrylyp, sý aralasqan taý jynystary qulaǵan bolatyn. Bul týraly «QazAqparat» HAA tilshisi.
Budan buryn habarlanǵandaı, qaýipsizdik maqsatynda «Qazmyrysh» kompanııasy sý shaıyp ketýi múmkin jerlerdi satyp alyp, osy aýmaqta ornalasqan úılerdiń turǵyndaryn qaýipsiz jerge kóshirgen bolatyn. Qazirgi tańda Rıdderdegi jumys táýlik boıy úzdiksiz júrgizilýde.
«Qazmyrysh» mamandarynyń aıtýynsha, qazirgi tańda apat bolǵan aýmaqtaǵy jaǵdaı jaqsaryp keledi. Kásiporyn mamandary sýdy aıdaý jumystaryn kúsheıtýde. Bul - tabıǵı apatty tolyq joıýǵa múmkindik beredi.
Sondaı-aq, kenish aýdanynda birneshe turǵyn úı ornalasqan. Karerdiń keńeıtilýine baılanysty uńǵymalardy burǵylaý jumystaryn júrgizý úshin jáne qajetti qubyr júıesin tartý úshin qosymsha alań qajet. Sondaı-aq, atalmysh kompanııa karer bortynyń odan ári jyljýyn esepke ala otyryp, jaqyn mańda ornalasqan 5 turǵyn úıdiń jer ýchaskesin satyp aldy.
Qazirgi tańda taǵy úsh úıdi satyp alý jumystary júrgizilýde. Kompanııa turǵyndarǵa jańa úıdi satyp alyp bergenge deıin olardy profılaktorııaǵa ornalastyrdy. Úı ıelerine tólengen ótemaqynyń mólsheri olardyń baspanalarynyń naryqtaǵy qunynan joǵary ekendigin aıta keteıik.
