Rıdderdegi jylý ortalyǵynyń jylytý maýsymyna daıyndyǵy qalaı

ÓSKEMEN.KAZINFORM – Shyǵys Qazaqstan oblysynda jylytý maýsymyna daıyndyq 1 qazanǵa deıin aıaqtalady dep josparlanǵan.

Óńirde jylý maýsymyna daıyndyq jumystary júrgizilip jatyr. Búgingi daıyndyq deńgeıi týraly ShQO Energetıka jáne turǵyn úı-kommýnaldyq sharýashylyq basqarmasynan málim etti. 

— Jylý kózderi men negizgi nysandardyń daıyndyǵy 90%-dan asty. Eń joǵary kórsetkish Sogra jylý elektr ortalyǵynda — 97,2% jáne Rıdder JEO-da — 93%. Óskemende daıyndyq deńgeıi — 86,2%. Jalpy óńirdegi JEO-lardyń ázirligi 89,8%-dy quraıdy. Sonymen qatar 537 shaqyrym elektr jelisi, 39 qosalqy stansa jáne 55 transformatorlyq pýnktke kúrdeli jóndeý júrgizildi, — delingen aqparatta. 

Ortalyqtandyrylǵan qazandyqtardyń 94%-y ázir. Ulan, Úlken Naryn jáne Katonqaraǵaı aýdandarynda bul jumystardyń qarqyny baıaýlaý. 

— Bıýdjettik mekemelerdiń qys kezine daıyndyǵy 98,7%-dy quraıdy. Mektepter men kolledjderde daıyndyq tolyq aıaqtalǵan. Densaýlyq saqtaý nysandarynda bul kórsetkish — 97%, áleýmettik qorǵaý salasynda — 83%, turǵyn úıler 96%-ǵa daıyn. Óskemende — 100, Rıdderde — 12, Glýbokoe aýdanynda — 2 úıdiń daıyndyǵy óz máresine jetpegen, — delingen habarlamada.

Eske salsaq, Premer mınıstr Rıdder, Kentaý, Ekibastuz energııa kózderin erekshe baqylaýǵa alý qajettigin aıtqan bolatyn.