Rıdderdegi jylý ortalyǵynda apat bolǵany jaıly aqparat – jalǵan

Rıdder qalasynyń ákimi Dáýlet Batyrbaev jylý elektr ortalyǵynda apat bolǵany jaıly aqparattyń shyndyqqa janaspaıtyndyǵyn málim etti, dep habarlaıdy Kazinform.

Áleýmettik jelide Rıdderdegi jylý elektr ortalyǵynda apat bolyp, úılerdiń jylýsyz qalǵany jaıly aqparat taraýda. Buǵan qatysty qala ákimi Dáýlet Batyrbaev jaýap berdi.

«Jalǵan aqparattyń taraýyna jergilikti aqparattyq resýrstarda Rıdder qalasy ákimi apparatynyń qate tujyrymdalǵan habarlamasy sebep bolǵan. JEO-da jylýdy toqtatý nemese qazandyq agregattarynyń toqtaýy bolǵan joq. Ortalyq qalypty rejımde jumys istep tur. Jylý berý jáne ystyq sýmen qamtamasyz etý úzilissiz júzege asyrylýda. Jeltoqsannyń 10-y kúni 10 jeltoqsanda BShM 2-niń kabeli úzilip qaldy. Alaıda Rıdder JEO-ny qalpyna keltirý kezinde júrgizilgen jóndeý jumystarynyń jáne jedel iske qosylǵan avtomatıkanyń arqasynda 2 saǵattan keıin qazandyq kómir otynyna aýystyrylyp, másele sheshimin tapty», - dedi ol.

Dáýlet Batyrbaevtyń aıtýynsha, aqaýlardy joıý kezinde Rıdder qalasy turǵyndarynyń páterleri men úılerindegi temperatýra +20S-tan tómen túsken joq, bul bekitilgen normatıvterge sáıkes keledi.

«Qazirgi ýaqytta Rıdder JEO qalypty rejımde jumysyn jalǵastyrýda. 4 qazandyq agregaty jumys istep tur, 2-i rezervte. Qalaǵa jylý jáne ystyq sý berý úzdiksiz júrgizilýde. Qurmetti azamattar, ákimdiktiń durys emes aqparaty úshin shyn júrekten keshirim suraımyn. Rıdder ákimdigi aldaǵy ýaqytta da ashyqtyq qaǵıdatyn ustanyp, halyqtyń aqparatqa qoljetimdiligin saqtaıdy dep sendiremin», - dedi ákim.