Rıdderdegi jylý elektr ortalyǵynda qansha qazandyq jumys istep tur

ÓSKEMEN. KAZINFORM – Shyǵys Qazaqstan oblysy Rıdder qalasyndaǵy jylý elektr ortalyǵynda 4 qazandyq jáne 1 týrboagregat iske qosylǵan.

Rıdderdegi jylý elektr ortalyǵy jylytý maýsymy bastalǵaly beri qalypty rejımde jumys istep tur.

- Qazirgi ýaqytta ortalyqtaǵy kómir qory 23 155 tonnany quraıdy, bul 25 táýlikke jetedi. Kómirdiń táýliktik shyǵyny - 900 tonna. Mazýt qory - 550 tonnadan asady. «Qarajyra» AQ-men qańtar aıyna josparlanǵan kómir jetkizý kólemi - 35 000 tonna. Jeltoqsan aıynda kómirdiń naqty jetkizilýi 27 myńǵa jýyq tonnany qurady. Osy sátte №1, 2, 3, 5 qazandyqtar jáne №1 týrboagregat jumys istep tur, - dep habarlady ShQO ákimdiginen. 

Jylytý maýsymy bastalar aldynda №1, 2, 4 jáne 5 qazandyq agregattary aǵymdaǵy jóndeýden ótken. Al №3 jáne №6 qazandyqtardy kúrdeli jóndeý jumystary aıaqtalǵan.

Eske salsaq, 2022 jyldyń kúzinde Rıdder qalasynda jylý elektr ortalyǵynan aqaý shyǵyp, halyq jylýsyz qalǵan bolatyn.