Rıdderdegi jalǵyz jaǵajaı jabylýy múmkin
ÓSKEMEN. KAZINFORM – Shyǵys Qazaqstan oblysy Rıdder qalasynyń turǵyndary shomylatyn jalǵyz ózen resmı túrde qaýipti dep tanylyp, jabylýy múmkin.
Jazdyń aptap ystyǵynda rıdderlikter bala-shaǵalarymen Jýravlıha ózenindegi jaǵajaıǵa jınalady. Alaıda jergilikti bılik endi bul jerdi jabý josparlanǵanyn málimdedi. Onyń ornyna munda ashyq basseınder salý usynylyp otyr.
Jýravlıha - Rıdder arqyly aǵyp ótetin 13 taý ózeniniń biri. Sýy salqyn ári aǵysy qatty bolǵanymen, dál osy jerde halyq shomylyp, ystyqtan saıa tabady. Alaıda bul jaǵajaı resmı tirkelmegen, ınfraqurylymy da joq.
- Jyl saıyn kásipkerlerge jaǵajaıdy óz qaraýyna alyp, qum tógip, kútip-ustaýyn suraımyz. Biraq shomylý maýsymy qysqa, kóktemde ózen tasyp, barlyq eńbekti shaıyp ketetindikten eshkim nıet bildirmeı keledi. Demalýshylar da kóp emes, salynǵan qarjy aqtalmaıdy, - deıdi Rıdder qalasy ákiminiń orynbasary Qanybek Tóleýhan.
Onyń aıtýynsha, jalǵyz tıimdi jol - jaǵalaýda jasandy basseınder salý. Jobada eresekterge arnalǵan bir úlken jáne balalarǵa arnalǵan bir shaǵyn basseın qarastyrylǵan. Sonymen qatar jatatyn aǵashtar, kıim aýystyratyn jerler men sanıtarlyq toraptar salý da josparlanǵan. Alaıda bul ázirge tek jospar ǵana. Jobaǵa bıýdjetten qarjy bólinbegen.
- Iá, basqa jerlerde ózen jaǵasynda basseın salǵandardy kórgenbiz. Árıne, sýdy tazalaý, aǵyndy sýdy tartý syndy sanıtarlyq talaptar oryndalýy tıis. Bul jobany iske asyrý úshin qarajat kerek, - dedi Qanybek Tóleýhan.
Shyǵys Qazaqstan oblysynda shomylý maýsymyna daıyndyq turǵysynan alǵanda jalpy jaǵdaı kóńil kónshiterlik emes. Resmı derek boıynsha, óńirdegi 25 jaǵajaıdyń tek 8-i ǵana maýsymǵa daıyn. Qalǵandarynda qutqarý beketteri joq, sý túbi tekserilmegen. Al Rıdderde resmı tirkelgen birde-bir shomylý orny joq.
Soǵan qaramastan qalalyq Tótenshe jaǵdaılar bóliminiń málimetinshe, Jýravlıha ózeniniń túbi maýsym bastalar aldynda tekserilgen.
- Qala ákimdiginiń ótinishi boıynsha bizdiń súńgýirler ózen túbin qarap shyǵyp, qaýipti zattardy alyp tastady. Qaladaǵy barlyq ózen ishinde Jýravlıha - eń jylysy, - deıdi Rıdder qalalyq TJB bastyǵy Evgenıı Tarasov.
Aıta keteıik, jýyrda Memleket basshysy Alakól jaǵajaıynyń jaǵdaıyna qatysty syn aıtqan soń, respýblıka kóleminde ózen-kólderge tekseris bastaldy. Rıdderge de Prezıdent ákimshiliginen memlekettik ınspektor kelip, Jýravlıha ózenin aralap kórip, bul jerde shomylý qaýipsiz emes degen qorytyndy jasaǵan.
Qazirgi ýaqytta rıdderlikter basqa jer bolmaǵan soń, sol qaýipti jaǵalaýǵa kelýge májbúr.
– Bizde basqa baratyn jer joq. Munda ǵana sý bar. Balalar da sýǵa túskisi keledi. Qaýipti ekenin bilemiz, sondyqtan balalardy kózden tasa qylmaımyz. Shyǵys Qazaqstandaǵy ekinshi iri qalada birde-bir resmı shomylýǵa bolatyn jaǵajaıdyń bolmaýy – uıat jaǵdaı, - deıdi jergilikti turǵyndar.
Rıdderde basseınderdiń salyný-salynbaýy kelesi jyldyń bıýdjettik josparyna baılanysty bolmaq.
Eske salsaq, osyǵan deıin Alakólde kater qaǵyp ketken áıel kóz jumǵany habarlanǵan.