Rıdderdegi taý shańǵy kýrorty keńeıtiletin boldy
ASTANA. KAZINFORM — ShQO prokýrorlary Rıdder qalasyndaǵy taý shańǵysy kýrortyn keńeıtýge ınvestorǵa kómektesti, dep habarlaıdy oblystyq prokýratýranyń baspasóz qyzmeti.
Shyǵys Qazaqstan oblysynyń prokýratýrasy Investorlardyń quqyqtaryn qorǵaý komıtettiń úılestirýimen «Skaı Taý Rıdder» JShS-niń zańdy múddelerin qorǵady. Investor Rıdder qalasynda óńir úshin mańyzdy taý shańǵysy keshenin rekonstrýktsııalaý jobasyn iske asyrýda.
— Onyń aıasynda qazirdiń ózinde 20 jergilikti turǵyn jumyspen qamtyldy. Jergilikti atqarýshy organ temirjol jelileriniń sanıtarlyq-qorǵaý aımaǵynda ornalasqanyn alǵa tartyp, kompanııaǵa qosymsha jer ýchaskesin berýden negizsiz bas tartqany anyqtaldy. Alaıda, halyqtyń sanıtarlyq-epıdemıologııalyq salamattylyǵy salasyndaǵy ýákiletti organnyń resmı málimetterine sáıkes, bul ýchaskeni málimdelgen maqsattarda paıdalanýǵa jol beriledi, — delingen habarlamada.
Prokýrorlyq qadaǵalaý aktisiniń arqasynda ákimshilik kedergi joıylyp, ınvestordyń quqyqtary tolyǵymen qalpyna keltirildi. Bul jobany iske asyrý týrıstik ınfraqurylymdy damytýǵa jáne óńirdiń ınvestıtsııalyq tartymdylyǵyn arttyrýǵa tikeleı yqpal etedi.
Shyǵys Qazaqstan oblysynyń prokýratýrasy ákimshilik kedergilerge tap bolǵan ınvestorlardy 8 (7232) 75-43-38, 8 (707) 126-96-26 nómirleri arqyly nemese 115 Call-ortalyǵyna habarlasýǵa shaqyrady.
Budan buryn Bektenov paıdaly qazbalardy óndirý salasynda ınvestorlarǵa jaǵdaı jasaý – Úkimettiń basym mindeti ekenin aıtqan edi.