Rıdderdegi kúsh synasý ekstrıminde ShQO-nyń eń myqty atletteri anyqtaldy
ÓSKEMEN. KAZINFORM – Rıdder qalasynda ótken kúsh synasý ekstrıminde Shyǵys Qazaqstannyń eń myqty sportshylary jınaldy.
Sportshylar bes kúrdeli ári standarttan tys saıys túrinde kúsh synasty. Týrnır barysynda qatysýshylar aýyrdy kóterip, myqtylyqtaryn pash etti.
Temir, tas jáne avtobýs
Týrnırde tózimdilik pen kúsh synaldy. Mysaly, 100 kelilik bóreneni bir mınýt ishinde múmkindiginshe kóp ret kóterý qajet boldy. Al «Apollon osi» jattyǵýynda tik tartý (stanovaıa tıaga) salmaǵy 300 kelige deıin jetti. Estafeta kezeńinde sportshylar 70 kelilik tasty kóterip, 80 kelilik dóńgelekti aýdardy.
Taǵy bir synaq — úsh tasty (80, 90 jáne 110 kelilik) arnaıy tuǵyrǵa kóterý. Eń sońǵy, ári eń kúrdeli kezeń — salmaǵy bes tonnany quraıtyn avtobýsty jyljytý. Alaıda bul synnan eshkim óte almady.
— Bul týrnır biz úshin jaı ǵana jarys emes, komandalyq rýhtyń sımvolyna aınaldy. Jarys óte áserli ótti, kórermender men jastardyń qyzyǵýshylyǵy joǵary boldy. Kópshiligi óz kúshin synap kórgisi keledi. Týrnır joǵary deńgeıde uıymdastyryldy, — dedi «Strong Men» ShQO federatsııasynyń prezıdenti Maksım Osıpov.
Týrnırdiń jeńimpazy Óskemen qalasynan kelgen paýerlıftıngten sport sheberi Vadım Makartsev boldy. Ol bul sportpen on jyldan beri aınalysyp keledi.
Kúmis júldeni Artem Pogrebnoı ıelense, qola medal rıdderlik sportshy Matveı Skalaberdınge buıyrdy. Jeńimpazdarǵa medaldar, dıplomdar men aqshalaı syılyqtar tabystaldy.
Áıelder de osal emes
Týrnır aıasynda áıel sportshylardyń da óneri kórermenderdiń erekshe yqylasyna bólendi. «Zilbalǵa ustaý» saıysynda paýerlıftıngten sport sheberi Olga Dýshaeva jeńimpaz atandy. Ol aldaǵy ýaqytta Qazaqstan namysyn Reseıde ótetin halyqaralyq týrnırde qorǵaıdy.
— Osy týrnırdi ekinshi jyl qatarynan ótkizip otyrmyz. Negizgi maqsatymyz — jastar arasynda sport túrlerin nasıhattaý jáne salaýatty ómir saltyn qalyptastyrý, — dep habarlady Rıdder qalasy ákimdiginen.
Eske salsaq, osyǵan deıin Qazaqstan quramasy eskek esý sportynan Azııa chempıonatynda 12 medal alǵany habarlanǵan.