Rıdderdegi kásiporynda ekologııalyq talaptardy buzýdyń 5 faktisi anyqtaldy
ÓSKEMEN. KAZINFORM — Shyǵys Qazaqstan oblysy Rıdder qalasyndaǵy «Qaztsınk» JShS-nyń taý-ken baıytý keshenine júrgizilgen jospardan tys tekserý nátıjesinde birqatar zańbuzýshylyq anyqtaldy.
Tekserý jumystaryn júrgizýge turǵyndardyń shaǵymy negiz bolǵan. Ekologııa departamentiniń mamandary kásiporynnyń óndiristik alańyna baryp, sý men topyraqtan synamalar alǵan.
— Zerthanalyq taldaý qorytyndysyna sáıkes, birqatar aýyr metaldar boıynsha ruqsat etilgen shekten asý faktileri tirkeldi. Tekserý nátıjesinde ekologııalyq zańnama talaptaryn buzýdyń 5 faktisi anyqtaldy, — dep habarlady departamenttiń baspasóz qyzmetinen.
Kásiporynǵa bul zańbuzýshylyqtardy joıý jóninde nusqama berildi. Sonymen qatar jalpy somasy 107 mln teńgege jýyq bes ákimshilik hattama toltyryldy.
Eske salsaq, osyǵan deıin ekologııalyq aıyppuldardan túsetin qarjy aýyldyq okrýgterdiń bıýdjetine beriletindigi habarlanǵan.