Rıdderde jylý qubyryn jóndep jatqanda turǵyn úıge zaqym keldi
Shyǵys Qazaqstan oblysy Rıdder qalasynda jylý qubyrlaryn jóndeý barysynda turǵyn úıge zaqym keldi, dep habarlaıdy QazAqparat tilshisi.
ShQO aqparat ortalyǵynyń málimetine súıensek, oqıǵa 14 qyrkúıek saǵat 23.00 shamasynda bolǵan.
«Jylý qubyrlaryn jóndeý barysynda jer qazý jumystary júrgizilgen. Sol kezde jeke turǵyn úıdiń irgetasynyń tósenishine zaqym keldi. Bul birqabatty 4 páterli jer úı. Onda barlyǵy 12 adam turady», - delingen habarlamada.
Abyroı bolǵanda, eshkim zardap shekpedi. Úıdiń nyq turýyna kedergi joq, ıaǵnı qulap qalý qaýpi baıqalmaıdy.
«Qala ákimdigi jáne tótenshe jaǵdaılar bóliminiń mamandarynan jedel túrde arnaıy top qurylyp, oqıǵa saldaryn anyqtaýda. Turǵyndar ýaqytsha týystarynyń úılerine bara turýdy durys kórdi», - delingen aqparatta.
