Rıdderde jylý elektr ortalyǵynan taǵy da aqaý shyǵyp, arnaıy shtab quryldy

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynda taǵy da apat bolyp, turǵyn úılerdegi 22 myńnan astam abonent úshin jylý berý azaıtyldy, dep habarlaıdy QazAqparat tilshisi.

Rıdderdegi elektr ortalyǵyndaǵy tótenshe jaǵdaıǵa oraı shuǵyl túrde arnaıy shtab qurylǵan. Bul týraly ShQO ákimi Danıal Ahmetov áleýmettik jelidegi paraqshasynda jazdy.

«5 qarasha kúni saǵat 20.00-de ortalyqtaǵy kúl shyǵarý júıesindegi sorǵy isten shyǵyp, №1 qazandyq agregatynyń qosalqy jabdyǵy apatty jaǵdaıda ajyratyldy. Sonyń saldarynan jylý tasyǵyshtyń temperatýrasy +39°S deıin tómendedi (qalypty temperatýra mólsheri +70°S). Qazirgi ýaqytta Rıdder qalasynyń 22 myńnan astam abonenti úshin jylý berý azaıtyldy.

Shuǵyl túrde aqaýdy joıý jónindegi shtab quryldy. Shtab táýlik boıy jumys isteıdi. Sondaı-aq, ortalyqqa Sogra jáne Óskemen JEO, «Óskemen jylý jelileri» AQ mamandary keldi. Qazirgi ýaqytta kúl shyǵarý júıesinde qozǵaltqyshty aýystyrý, iske qosý-retteý jumystary júrgizilýde», - deıdi ákim.

Onyń aıtýynsha, JEO-ǵa qosymsha 120 tonna mazýt jetkizildi. Otyndy jóneltý jalǵasýda. Apatty jaǵdaıdy joıý úshin «Qazmyrysh» JShS JEO-ǵa 20-dan astam qyzmetker jiberip, jóndeý-qalpyna keltirý jumystaryna qosymsha jabdyqtar bóldi. Óskemennen kómek retinde «Vostokvzryvprom» JShS-niń 20 qyzmetkeri de kelgen.

«Sonymen qatar qalanyń energojúıesiniń úzdiksiz jumys isteýi úshin «Birikken EnergoServıstik Kompanııasy» AQ Rıdderge 12 avarııalyq brıgada jiberdi. Rıdder qalasynyń bilim bólimi basshysy mindetin atqarýshynyń buıryǵymen 7-11 qarasha aralyǵynda mektep oqýshylary qashyqtan oqytý formatyna kóshedi. Osy ýaqyt ishinde qalanyń mektepke deıingi mekemeleri óz jumysyn toqtatady.

«Tabıǵı jáne tehnogendik sıpattaǵy tótenshe jaǵdaılardyń synyptamasyn belgileý týraly» Qazaqstan Respýblıkasy Úkimetiniń 2014 jylǵy 2 shildedegi № 756 qaýlysyna sáıkes bul apattyq jaǵdaı jergilikti aýqymdaǵy tótenshe jaǵdaı retinde jikteledi», - dedi Danıal Ahmetov.

Aımaq basshysynyń aıtýynsha, jaǵdaı erekshe baqylaýda. Rıdder qalasyn jylýmen jabdyqtaýdy qalpyna keltirý boıynsha barlyq qajetti sharalar qabyldanýda.

Eske salsaq, 23 qazanda Rıdderdegi jylý elektr ortalyǵynda aqaý shyǵyp, halyq jylýsyz qalǵan bolatyn.