Rıdderde júrgizýshi kýáliginen aıyrylsa da, mas kúıinde rýlge otyrǵan adam jol apatyna tústi
RIDDER. QazAqparat – Shyǵys Qazaqstan oblysy Rıdder qalasynda kólik júrgizý quqyǵynan aıyrylsa da, ishimdik iship alyp rýlge otyrǵan er adam jol apatyna tústi, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, «102» jedel arnasyna qońyraý shalǵan 68 jastaǵy zeınetker 3-shi shaǵynaýdanda jol-kólik oqıǵasy bolǵanyn aıtqan.
Anyqtalǵandaı, «Nıva» avtokóligin tizgindegen er adam úı aýlasynan shyǵa bergende turaqta turǵan «Toyota» kóligine soqtyǵysyp, birden sol jerden iz sýytqan.
«Polıtsııa qyzmetkerleri júrgizýshi kýáliginen aıyrylsa da mas kúıde kólik aıdaǵan 57 jastaǵy qala turǵynyn ustady. Atalǵan fakti boıynsha QR Qylmystyq Kodeksiniń 346-baby 2-bóligine sáıkes sotqa deıingi tergeý amaldary júrgizilýde», - dedi ShQO PD bastyǵy Saǵat Mádıev.
