Rıdderde jylytý maýsymy bastalsa da JEO-daǵy jóndeý jumystary jalǵasyp jatyr

ÓSKEMEN. KAZINFORM – Shyǵys Qazaqstan oblysyndaǵy Rıdder qalasynda jylytý maýsymy bastalsa da jylý-elektr ortalyǵyndaǵy jóndeý jumystary jalǵasyp jatyr.

ShQO Energetıka jáne turǵyn úı-kommýnaldyq sharýashylyq basqarmasynyń málimetine súıensek, Rıdderdegi jylý-elektr ortalyǵynda 11 qazanǵa deıin 4 qazandyq iske qosylady. 

«Úılerge jylý baryp turýy úshin JEO-da eki qazandyq úzdiksiz jumys istep turýy tıis. Sonda bizde taǵy 2 qazandyq rezervte bolady. Al 10 qarashaǵa deıin №4 jáne №5 eki iri qazandyqta jóndeý jumystary aıaqtalady. Barlyq jóndeý jumystary bekitilgen kestege sáıkes júrgiziledi», - deıdi basqarma basshysy Nurlan Ramazanov.

Onyń aıtýynsha, jylý elektr ortalyǵynda kómir men mazýt qory jetkilikti. Jaz kezinde Rıdder qalasyndaǵy 19 shaqyrym jylý jelisine jóndeý jumystary júrgizilgen.

«2022-2023 jylytý maýsymynda Rıdderdegi JEO-da qazandyq 84 ret óship qalsa, byltyr tek 5 ret óshken. Bul rette eń bastysy – turǵyn úılerdegi temperatýranyń tómendeýine jol bermeý. Byltyrdan beri ortalyqta júrgizilip jatqan kúrdeli jóndeý jumystary osy jylytý maýsymyn qalypty rejımde ótkizýge múmkindik beredi», - deıdi N. Ramazanov.

Eske salsaq, bıyl qyrkúıek aıynyń ortasynda Rıdder jylý ortalyǵynda qazandyqtar iske qosylyp jatqanyn habarlaǵan edik.