Rıdderde jaz boıy ystyq sý bolmaıdy
ÓSKEMEN. KAZINFORM — Shyǵys Qazaqstan oblysy Rıdder qalasynda jaz boıy ystyq sý bolmaıdy.
Rıdderde jylý jelilerin aýystyrý jáne jylý elektr ortalyǵynda aýqymdy jóndeý jumystary bastaldy.
Soǵan baılanysty qalada 10 mamyr men 1 qyrkúıek aralyǵynda turǵyn úıler men mekemelerde ystyq sý bolmaıdy.
«Ótken jyldyń jazy men kúzinde JEO-da jóndeý jumystary qolǵa alynyp, qıyn jaǵdaı turaqtandyrylǵan bolatyn. Osylaısha, 2023-2024 jyldardaǵy jylytý maýsymy kúrdeli aqaýsyz ótti. Bıyl da jóndeý jumystary jalǵasady. Byltyr jóndeýmen qamtylmaǵan qazandyq agregattaryn, týrbogeneratorlardy, qosalqy jabdyqtardy kúrdeli jóndeý josparlanyp otyr», — dep habarlady qala ákimdiginen.
Sondaı-aq jalpy uzyndyǵy 18,9 shaqyrym bolatyn jylý jelileriniń 55 ýchaskesinde kúrdeli jóndeý jumystaryn júrgizilmek.
«Barlyq jumysty belgilengen merzimde aıaqtaý josparlanyp otyr. Olardyń oryndalý barysy únemi baqylaýda bolady» delingen aqparatta.
