Rıdderde janarmaı tapshylyǵyna qatysty aqparatqa ákimdikten jaýap berdi

ÓSKEMEN. KAZINFORM — Qalalyq ákimdik Shyǵys Qazaqstan oblysy Rıdder qalasynda janarmaı tapshylyǵyna qatysty tarap jatqan aqparatqa qatysty túsinikteme jasady.

Búgin áleýmettik jelide Rıdder qalasynda janar-jaǵarmaı tapshylyǵy týraly aqparat tarady. Onda jazylǵandaı, «Helios» janarmaı quıý beketinde janarmaı joq ekeni, AI-92 markaly benzınmen ǵana janarmaı quıý múmkin bolyp otyrǵany, al dızel otyny talon arqyly berilip jatqany týraly jazylǵan.

Osyǵan qatysty qalalyq kásipkerlik jáne týrızm bólimi jaýap berdi. Olar beketterdegi janar-jaǵarmaı tapshylyǵy týraly aqparatty joqqa shyǵardy.

— 23 aqpan kúni AI-92 jáne AI-95 markaly benzın, sondaı-aq dızel otyny «Bazis Aero», «Helios», «Alem Simple Service», «Resýrsy Vostoka» jáne «Qazaq Oil» janarmaı quıý beketterinde erkin satylymda bar, — delingen aqparatta.

Eske salsaq, osyǵan deıin Túrkistan oblysynda 89 janarmaı quıý beketinde baǵany ósirý faktileri anyqtalǵany habarlanǵan.