Rıdderde jańa statsıonardyń qurylysy tym baıaý júrgizilýde
Bir jarym jyldan astam ýaqyt buryn Rıdder turǵyndary jaqyn arada olardyń qalasynda úlken emhanasy bar, bir aýysymda 500 adam qabyldaıtyn kópsalaly medıtsınalyq ortalyq jáne sońǵy tehnıkamen jabdyqtalǵan kópten kútken statsıonar paıda bolatyny týraly jańalyqqa qýandy. Biraq sol qýanyshtary uzaqqa sozylmady.
Zamanaýı statsıonar salý úshin eski medıtsınalyq mekemeniń ǵımaraty súrilgen edi. Qyzmetkerler men patsıentter kórshi korpýsqa ornalastyryldy. Onda qazir 3 bólimsheniń ornynda 5 bólimshe otyr. Taǵy 2 bólimshe qalanyń basqa shaǵyn aýdanyna kóshirildi. Qurylysty kelesi jyly aıaqtaý josparlanǵan bolatyn, alaıda statsıonardyń shuńqyry ǵana qazylyp turǵanyna eki aı boldy.
«Búginde biz Densaýlyq saqtaý mınıstrliginiń buıryqtary boıynsha talap etiletin jańa palatalar, kabınetter asha almaı otyrmyz. TRIAJ-júıesin de sońyna deıin jetkize almadyq. Bir palatada keıde 6 adamǵa deıin jatady, bir dárethanany bir bólimshe túgeldeı qoldanady. Perzenthanada negizinen ár palatanyń jeke sanıtarlyq bólmesi bolýy kerek. Joba boıynsha jańa aýrýhanaǵa jańa jabdyqtar da ýáde etildi. Qala turǵyndary jańa aýrýhananyń salynýyn asyǵa kútýde», - deıdi Rıdder qalalyq aýrýhanasynyń bas dárigeri Gúlnar Kitappaeva.
Rıdderlikter eski aýrýhananyń tar dálizderinde uzaq ýaqyt kezekte turýǵa májbúr. Qajet bolǵan jaǵdaıda arnaıy jabdyqta dıagnostıkalyq tekserýden ótý úshin Óskemenge barýlaryna týra keledi. 50 myńǵa jýyq halqy bar qalada KT apparat ta joq.
«Jańa emhananyń ǵımaraty turǵyzyldy, syrtqy jáne ishki árleý jumystary júrgizilýde. Shamamen 2 aı buryn biz statsıonar salý úshin shuńqyr daıyndadyq. Jobany túzetýdi kútip otyrmyz. Bastapqy joba boıynsha munda 140 tósek-oryn josparlanǵan, biraq endi ózgerister bolýy múmkin», - deıdi «ELHON» JShS qurylys kompanııasynyń ýchaske bastyǵy Jánibek Jalǵantyqov.