Rıdderde vandaldar balalar oıyn alańyn qıratyp ketti
ÓSKEMEN. KAZINFORM – Shyǵys Qazaqstan oblysy Rıdder qalasynda jasóspirim vandaldar balalar oıyn alańyn qıratyp tastaǵan.
ShQO Polıtsııa departamenti baspasóz qyzmetiniń málimetine súıensek, jasóspirimderdiń zańsyz áreketine jergilikti turǵyndar shaǵymdanǵan. Polıtsııa quqyq buzýshylardyń kim ekenin anyqtady.
«Instagram áleýmettik jelisindegi paraqshalardyń birinde rıdderlik azamat eki vandaldyń balalar oıyn alańyn qıratyp jatqany kórinetin vıdeo jarııalady. Turǵyndardyń eskertýin elemegen olar eshqandaı jaýapkershilikke tartylmaıtyndyqtaryn, eski oıyn alańynyń ornyna jaqyn arada jańasy salatyny týraly estigendikterin aıtqan. Biraq bul aıtqandary shyndyqqa janaspaıdy», - delingen aqparatta.
Tártip saqshylary 14 jáne 15 jastaǵy vandaldarǵa qatysty «Buzaqylyq» faktisi boıynsha is qozǵap, ekeýiniń zańdy ókilderin jaýapqa tartty. Sonymen qatar polıtsııa qyzmetkerleri jasóspirimdermen jáne olardyń ata-analarymen profılaktıkalyq áńgime júrgizdi.
